Shaxmat Olimpiadasi. O‘zbekiston erkaklar terma jamoasi mezbonlar bilan durang o‘ynadi, qizlarda yirik g‘alaba

Hindistonning Chennai shahri mezbonligida o‘tayotgan Butunjahon shaxmat Olimpiadasining 3-avgust kungi bahslari yakunlandi.

O‘zbekiston erkaklar terma jamoasi 6-tur doirasida musobaqaga ikkinchi raqamda saralangan Hindistonga qarshi dona surgan bo‘lsa, ayollar terma jamoasi Shotlandiya bilan bahs yuritdi.

Hindistonga qarshi kechgan bahsda 2:2 hisobi qayd etildi. Shamsiddin Vohidov o‘z partiyasini yutgan bo‘lsa, Nodirbek Abdusattarov kuchli raqibiga imkoniyatni boy berib, musobaqadagi ilk mag‘lubiyatni qabul qilib oldi. Javohir Sindorov va Nodirbek Yoqubboyev esa durangga erishdi.

Ayollar terma jamoasi a’zolari Shotlandiya ustidan 4:0 hisobidagi g‘alabani qo‘lga kiritdi. Umida Omonova, Maftuna Bobomurodova, Afruza Hamdamova va Marjona Malikova raqiblari ustidan g‘alabaga erishdi.

6-turdan keyin O‘zbekiston erkaklar terma jamoasi umumiy reytingda 4-o‘rinda bormoqda, qizlar esa 37-pog‘onadan joy olgan. Eslatib o‘tamiz, erkaklar terma jamoasi musobaqaga 14-raqamda, ayollar esa 46-raqamda saralangan.

5-avgust kuni 7-tur bahslari bo‘lib o‘tadi. Unda erkaklar terma jamoasi Peru bilan o‘ynasa, ayollar Serbiyaga qarshi dona suradi.

Mavzuga doir: O‘zbekiston erkaklar terma jamoasi Butunjahon shaxmat Olimpiadasida 5-turdan keyin kuchli uchlikda bormoqda