Toshkent shahridagi Milliy matbuot markazida 3-avgust, chorshanba kuni kurash sport turi bo‘yicha mutasaddilar va turli OAV vakillari ishtirokida matbuot anjumani bo‘lib o‘tdi, deya xabar beradi “Daryo” muxbiri.
Anjumanning asosiy mavzusi 24-iyul kuni Fransiyada bo‘lib o‘tgan O‘zbekiston prezidenti sovrini uchun kurash bo‘yicha xalqaro turnir yakunlari va kelgusida rejalashtirilayotgan musobaqalar xususida bo‘ldi.
Parij shahrida bo‘lib o‘tgan musobaqada dunyoning 30 ga yaqin davlatidan tashrif buyurgan polvonlar g‘oliblik uchun kurash olib borgan. Fransiya, Germaniya, Italiya, Gretsiya, Turkiya, Ukraina, Belgiya, Shveysariya, Qozog‘iston, O‘zbekiston, Ispaniya va boshqa davlatlardan tashrif buyurgan sportchilar mutlaq vazn toifasida gilamga chiqqan. Eyfel minorasi ostida bo‘lib o‘tgan mazkur turnirda o‘zbekistonlik Muhammadkarim Xurramov oltin medalni qo‘lga kiritdi.
O‘zbekiston prezidenti sovrini uchun kurash Fransiyadan tashqari Germaniya, Turkiya va Bolgariya davlatlarida ham bo‘lib o‘tgan.
“2023-yil Polshada III ‘Yevropa o‘yinlari’ bo‘lib o‘tadi. Ushbu nufuzli musobaqa dasturiga kurashni ko‘rgazmali chiqish sifatida qo‘shish sifatida musobaqa tashkil qo‘mitasi tomonidan qo‘llab-quvvatlanmoqda”, – deydi O‘zbekiston MOQ Kurash milliy sport turini rivojlantirish bo‘limi boshlig‘i Kamol Usmonov.
Bundan tashqari 2022-yilning sentabr—oktabr oylarida AQSH, Polsha, Misr kabi mamlakatlarda ham kurash bo‘yicha xalqaro turnirlar o‘tkazilishi ko‘zda tutilgan.
Izoh (0)