Farg‘onada Germaniya bilan hamkorlikda zamonaviy tibbiy diagnostika markazi barpo etiladi

Farg‘onada Germaniya standartlari asosida zamonaviy laboratoriya hamda tibbiy diagnostika markazi barpo etiladi. Bu haqda Xayrullo Bozorov boshchiligidagi Farg‘ona viloyati delegatsiyasining 25—30-iyul kunlari Germaniya va Avstriyaga tashrifi davomida kelishuvga erishildi, deya xabar bermoqda “Daryo” muxbiri.

Qayd etilishicha, Germaniyaning “RCI Consulting International” kompaniyasi hamda “Luqmoni Hakim Farg‘ona German Medical” hamkorligida Farg‘ona shahrida Germaniya standartlari asosida zamonaviy laboratoriya bilan jihozlangan tibbiy diagnostika markazi barpo etish bo‘yicha shartnoma imzolangan. Nemis investitsiyasi ishtirokidagi loyihaning qiymati 10 million dollarni tashkil qiladi.

Diagnostika markaziga pozitron-emission tomografiya (PET) uskunasi o‘rnatiladi, ushbu klinikaning o‘zida PET uskunasi uchun zarur bo‘lgan siklatron-radioizotop suyuqligini ishlab chiqarish yo‘lga qo‘yiladi. Shartnomaga binoan, mazkur tibbiy diagnostika markazi bir yil muddatda foydalanishga topshiriladi.

Shuningdek, “Dixion Vertrieb medizinischer Geräte” va Farg‘ona shahridagi “Marafon Group” xolding kompaniyasi tarkibidagi “Meridian Diagnostic Hospital” o‘rtasida tibbiyot jihozlarini Farg‘ona viloyatida yig‘ish loyihasi doirasida 3 million yevrolik kelishuvga erishildi.

Germaniyaning “OPASCA” kompaniyasi bilan muzokaralarda viloyat sog‘liqni saqlash tizimini raqamlashtirish, mavjud bemorlar va kasalliklarni yagona monitoring bazasini yaratish hamda tibbiyot sohasidagi investitsiya loyihalarini moliyalashtirish uchun nemis banklari kredit liniyalarini jalb qilish yuzasidan hamkorlik o‘rnatish yo‘nalishlarida kelishuvlarga erishildi.

O‘zbek shifokorlarini nemis soha mutaxassislari yordamida malakasini oshirish, Farg‘ona tibbiyot universiteti va Mangeym universitetlari o‘rtasida hamkorlik o‘rnatish, nevrologiya, pediatriya va radikologiya sohalariga Germaniya ta’lim standartini jalb qilishga kelishib olindi.

Joriy yil sentabr oyida farg‘onalik shifokorlar guruhi Mangeym shahriga borishi, nemis universiteti rahbariyati esa oktyabr oyida Farg‘ona viloyatiga kelishi rejalashtirilmoqda.