Фарғонада Германия стандартлари асосида замонавий лаборатория ҳамда тиббий диагностика маркази барпо этилади. Бу ҳақда Хайрулло Бозоров бошчилигидаги Фарғона вилояти делегациясининг 25—30 июль кунлари Германия ва Австрияга ташрифи давомида келишувга эришилди, дея хабар бермоқда «Дарё» мухбири.
Қайд этилишича, Германиянинг «RCI Consulting International» компанияси ҳамда «Luqmoni Hakim Farg‘ona German Medical» ҳамкорлигида Фарғона шаҳрида Германия стандартлари асосида замонавий лаборатория билан жиҳозланган тиббий диагностика маркази барпо этиш бўйича шартнома имзоланган. Немис инвестицияси иштирокидаги лойиҳанинг қиймати 10 миллион долларни ташкил қилади.
Диагностика марказига позитрон-эмиссион томография (PET) ускунаси ўрнатилади, ушбу клиниканинг ўзида PET ускунаси учун зарур бўлган циклатрон-радиоизотоп суюқлигини ишлаб чиқариш йўлга қўйилади. Шартномага биноан, мазкур тиббий диагностика маркази бир йил муддатда фойдаланишга топширилади.
Шунингдек, «Dixion Vertrieb medizinischer Geräte» ва Фарғона шаҳридаги «Marafon Group» холдинг компанияси таркибидаги «Meridian Diagnostic Hospital» ўртасида тиббиёт жиҳозларини Фарғона вилоятида йиғиш лойиҳаси доирасида 3 миллион евролик келишувга эришилди.
Германиянинг «OPASCA» компанияси билан музокараларда вилоят соғлиқни сақлаш тизимини рақамлаштириш, мавжуд беморлар ва касалликларни ягона мониторинг базасини яратиш ҳамда тиббиёт соҳасидаги инвестиция лойиҳаларини молиялаштириш учун немис банклари кредит линияларини жалб қилиш юзасидан ҳамкорлик ўрнатиш йўналишларида келишувларга эришилди.
Ўзбек шифокорларини немис соҳа мутахассислари ёрдамида малакасини ошириш, Фарғона тиббиёт университети ва Мангейм университетлари ўртасида ҳамкорлик ўрнатиш, неврология, педиатрия ва радикология соҳаларига Германия таълим стандартини жалб қилишга келишиб олинди.
Жорий йил сентябрь ойида фарғоналик шифокорлар гуруҳи Мангейм шаҳрига бориши, немис университети раҳбарияти эса октябр ойида Фарғона вилоятига келиши режалаштирилмоқда.
Изоҳ (0)