Koreyaning yangi saylangan prezidenti O‘zbekiston bilan yo‘lga qo‘yilgan siyosatni avvalgidek davom ettirish niyatida. Bu haqda Senat raisi Tanzila Norboyeva Koreya bilan erishilgan kelishuvlar ijrosini ta’minlash yuzasidan o‘tkazilgan yig‘ilishda ma’lum qildi, deya xabar bermoqda “Daryo muxbiri.
Tanzila Norboyevaning aytishicha, Koreya bilan munosabatlar avvalgidek davom etishi bildirilgan bo‘lsa-da, O‘zbekiston vazirlik va idoralari ikki tomonlama erishilgan kelishuvlar bo‘yicha samarali ishlamayapti.
“Koreyaning yangi saylangan prezidenti O‘zbekiston bilan yo‘lga qo‘yilgan siyosatni avvalgidek davom ettirish niyatida. Munosabatlarda hech qanday o‘zgarishlar bo‘lmaydi. Hamkorlik kuchaysa kuchayadiki, boshqa tomonga siljishlar kuzatilmaydi. Vazirlik va idoralar Koreya bilan erishilgan kelishuvlar bo‘yicha amaliy harakatlarni tanqidiy ko‘rib chiqishi kerak.
Davlat rahbarining 2021-yil 28-dekabrdagi qarori bilan tasdiqlangan 3 ta amaliy harakatlar rejalarida jami 116 ta banddagi vazifalarning 5 tasi bajarilgan, 77 tasi o‘z vaqtida bajarilmoqda, 34 tasining (29 foizi) ijrosi kechiktirilmoqda. “Yo‘l xarita”larning ijro holatini qoniqarli deb bo‘lmaydi”, – dedi Senat raisi.
Tanzila Norboyevaning ta’kidlashicha, 3-ilova bilan tasdiqlangan “yo‘l xarita”si ijrosiga Investitsiyalar va tashqi savdo vazirligi mas’ul. Ammo vazirlik kelishuvda ko‘rsatilgan loyihalarni o‘z holiga tashlab qo‘ygan.
“Muammoning sabablarini o‘rganish va bartafar etish bo‘yicha amaliy harakatlar ko‘rinmayapti. Vazirlik kiritgan ma’lumotiga ko‘ra, 40 ta investitsiya loyihadan 10 tasi qoloqlik bilan amalga oshirilyapti. Muammoning sabablari keltirilmagan, takliflar esa nomiga (belgilangan vazifani bajarish haqida) berilmoqda. Bizning o‘rganishlarimiz esa, qoloqlik bilan amalga oshirilayotgan loyihalar soni ko‘pligini ko‘rsatmoqda, ya’ni 21 ta loyiha o‘z vaqtida bajarilmayapti”, – dedi Senat rahbari.
Avvalroq Tanzila Norboyeva Farg‘ona viloyatining ayrim hududlari chegaralari o‘zgartirilishi rejalashtirilayotganini ma’lum qilgandi.
Izoh (0)