O‘zbekiston hukumati Farg‘ona viloyatining ayrim hududlari chegaralarini o‘zgartirish yuzasidan parlamentga so‘rov yubordi. Bu haqda Senat raisi Tanzila Norboyeva Koreya bilan erishilgan kelishuvlar ijrosini ta’minlash yuzasidan o‘tkazilgan yig‘ilishda ma’lum qildi, deya xabar bermoqda “Daryo” muxbiri.
Tanzila Norboyevaning aytishicha, parlamentga viloyatdagi 6 ta tuman va 3 ta shahar chegaralarini o‘zgartirish bo‘yicha hujjatlar taqdim etilgan.
“Farg‘ona viloyati hokimligi tomonidan Qo‘qon shahrida zamonaviy turar joy binolari barpo etish uchun yer ajratish masalasida hukumat qarori loyihasi ishlab chiqilgan. Tahlillarga ko‘ra, Qo‘qon shahrida zamonaviy turar joyni qurish uchun ajratilayotgan yer maydoni ayni paytda Dang‘ara tumaniga qarashli. Ushbu masalani yechimi sifatida mazkur yer maydonini Qo‘qon shahar hududiga o‘tkazish taklifi bildirilgan.
Hukumat tomonidan Farg‘ona viloyatining ayrim hududlari chegaralarini, ya’ni Uchko‘prik, O‘zbekiston, Dang‘ara, Qo‘shtepa, Toshloq, Farg‘ona tumanlari hamda Qo‘qon, Marg‘ilon, Farg‘ona shaharlari chegaralarini o‘zgartirish yuzasidan parlamentga hujjatlar taqdim qilinib, so‘rov yuborilgan. Mazkur masala Qonunchilik palatasida qabul qilingandan keyin Senatda ko‘rib chiqiladi” – dedi Senat raisi.
Avvalroq Senat yalpi majlisida Qashqadaryo viloyati Chiroqchi tumanining chegaralarini o‘zgartirish va Ko‘kdala tumanini tashkil etish to‘g‘risida qaror qabul qilingandi.
Izoh (0)