Toshkentdagi maktablarning birida maktab formasi sotib olinishi shartligi bo‘yicha prokuratura xodimlari tilxat yozdirgani haqida xabar ijtimoiy tarmoqlarda tarqalgandi. Bosh prokuratura matbuot xizmati mazkur xabar yuzasidan ishchi guruhning o‘rganish natijalarini e’lon qildi.

O‘rganishda Chilonzor tumanidagi maktablarning birida forma sotib olish bo‘yicha prokuratura organlari tomonidan hech qanday tavsiya berilmagani va tilxat olinmagani, aslida bu maktab direktorining shaxsiy tashabbusi ekani, biroq bu jarayonga yolg‘ondan prokuraturani aralashtirgani aniqlangan.

Kelgusida bunday holatlarga yo‘l qo‘yilmaslik haqida maktab direktori rasman ogohlantirilgan.

Ma’lumot uchun, 27-iyul kuni AOKAda o‘tkazilgan brifingda xalq ta’limi vaziri Baxtiyor Saidov yagona maktab formasi 2025-yilga qadar bosqichma-bosqich joriy etilishi, ya’ni yangi o‘quv yili — 2022-yil sentabrdan boshlab ota-onalar yagona maktab formasini xarid qilishga majburiy talab qo‘yilmasligini aytgandi.