Buxoro viloyati Kogon tumanida 1 yil oldin o‘g‘rilik sodir etgan shaxslar ushlandi. Bu haqda viloyat ichki ishlar boshqarmasi axborot xizmati xabar qildi.
Ma’lumotga ko‘ra, 2021-yil 25-avgust kuni noma’lum shaxs tumandagi “Taraqqiyot” mahallasida yashovchi N.F.ning uyiga g‘ayriqonuniy ravishda kirib, uning yotoqxonasidagi javon ichidan 20 turdagi tilla taqinchoqlarni, 120 dollar, 5000 Rossiya rubli va 250 000 so‘m pullarini yashirin ravishda o‘g‘irlab, jabrlanuvchiga jami 49 million 550 ming so‘m miqdorda moddiy zarar yetkazgan. Mazkur holat yuzasidan Jinoyat kodeksining 169-moddasi 2-qismi bilan jinoyat ishi qo‘zg‘atilib, bir qator tezkor surishtiruv hamda tergov harakatlari olib borilgan. Ammo jinoyat sodir etgan shaxslarni aniqlashning imkoni bo‘lmagan.
Olib borilgan surishtiruv hamda tergov harakatlari natijasida o‘g‘rilik sodir etilgan kundan bir yil o‘tib mazkur jinoyatni sodir qilgan shaxslar aniqlandi. Ushbu jinoyatni sodir qilganlar — Samarqand viloyati Jomboy tumani Ko‘kgumbaz mahallasida yashovchi, 2000-yilda tug‘ilgan A.O. o‘zining jinoiy sherigi — 2000-yilda tug‘ilgan J.F. ashyoviy dalillar bilan qo‘lga olindi.
Jinoiy guruhning boshqa hududlarda, jumladan, Buxoro tumanida ham o‘g‘rilik jinoyatini sodir etgani aniqlangan. Hozirda guruh a’zolariga nisbatan qamoqqa olish tarzidagi ehtiyot chorasi qo‘llanilgan. Shuningdek, respublikaning boshqa hududlarida sodir etilib, fosh etilmasdan qolayotgan o‘g‘rilik va boshqa turdagi jinoyatlarga aloqadorligini aniqlash yuzasidan tergov harakatlari davom ettirilmoqda.
Izoh (0)