Toshkent shahrida uch mamlakatlarining tashqi siyosat, savdo, iqtisodiyot va transport masalalariga mas’ul bo‘lgan vazirliklari rahbarlari ishtirokidagi “O‘zbekiston—Ozarbayjon—Turkiya” uch tomonlama birinchi yig‘ilishi bo‘lib o‘tdi, deb xabar bermoqda Dunyo axborot agentligi.
Qayd etilishicha, tadbirda so‘zga chiqqan O‘zbekiston tashqi ishlar vaziri vazifasini bajaruvchi Vladimir Norov quyidagilarni qayd etgan:
“Boku–Tbilisi–Kars temiryo‘lining tranzit salohiyatidan foydalanish O‘zbekiston uchun katta ahamiyatga ega. Bugun biz Xitoy–Qirg‘iziston-O‘zbekiston temiryo‘li qurilishi loyihasining texnik-iqtisodiy asosini ishlab chiqish ustida ish olib bormoqdamiz.SHHT davlat rahbarlarining shu yil 15—16-sentabr kunlari Samarqandda bo‘lib o‘tgan sammitida tegishli uch tomonlama hujjat imzolanishi rejalashtirilgan.
Xitoy—Qirg‘iziston—O‘zbekiston temiryo‘l yo‘lagining Transkavkaz yo‘lagi bilan bog‘lanishi mamlakatlarimiz o‘rtasida yagona transport tarmog‘ini yaratadi va Xitoydan Yevropaga savdo geografiyasini kengaytiradi, deb hisoblaymiz.
Aynan shu boisdan O‘zbekiston Osiyodan Yevropaga eng qisqa quruqlik yo‘lini ta’minlashi mumkin bo‘lgan Zangezur yo‘lagining tiklanishidan manfaatdor”, — deydi u.
Izoh (0)