O‘zbekistonda o‘tgan 6 oyda temiryo‘llarda xavfsizlikka tahdid soluvchi qancha kamchilik aniqlangani ma’lum qilindi

O‘zbekistonda o‘tgan olti oyda temiryo‘llarda yuk va yo‘lovchi tashish bilan bog‘liq 9837 ta kamchilik aniqlangan bo‘lib, ularning 4452 tasi xavfsizlikka tahdid soluvchi bo‘lgan. Bu haqda AOKAda o‘tkazilgan brifingda “O‘ztemiryo‘lnazorat” inspeksiyasi axborot xizmati rahbari Firdavs Xayriddinov ma’lum qildi.

Uning aytishicha, inspeksiya tomonidan 2022-yilning 6 oyi davomida jami 107 ta korxona va tashkilotlarda nazorat tadbirlari o‘tkazilgan. Tekshirish natijalari bo‘yicha aniqlangan kamchiliklarni bartaraf etish yuzasidan tadbirkorlik subyektlariga taqiqlovchi choralarni belgilovchi 104 ta bajarilishi majburiy bo‘lgan ko‘rsatmalar berilgan.

Shu vaqt davomida jami 304 temiryo‘llari, 113 ta lokomotiv, 941 ta yuk va yo‘lovchi vagoni nosozligi yoki foydalanish muddati o‘tganligi aniqlanib, foydalanishdan to‘xtatilgan.

Amalga oshirilgan tizimli ishlar natijasida, 2022-yilning 6 oyida temiryo‘l transportida harakatlanish xavfsizligi buzilishlarining umumiy soni 2021-yilning shu davriga nisbatan 20 foizga kamaygan bo‘lib, bu ko‘rsatkich 2022-yilda 34 ta holatni tashkil etgan bo‘lsa, 2021-yildagidan 8 ta holatga kamaygani qayd etilgan.

Joriy yilning dastlabki yarim yilligida “O‘zbekiston temir yo‘llari” AJga qarashli temiryo‘llarda poyezdlar harakat xavfsizligi buzilishi bo‘yicha o‘tgan yilgi ko‘rsatkich 22 ta holat o‘zgarishsiz qolgan. Mazkur ko‘rsatkich sanoat korxonalari shoxobcha yo‘llarida 2022-yilning 6 oyi davomida 8 taga kamayib, 12 ta holatni tashkil etgan.

“O‘zbekiston temir yo‘llari” AJ, vazirlik va idoralarga qarashli temiryo‘llarda yo‘l qo‘yilgan temiryo‘l tashishlari xavfsizligi buzilishlarining tahlili temiryo‘llarda tashishlar xavfsizligi buzilishlari:

• 23 ta holatda — harakatdagi tarkib va texnik vositalarning texnik nosozliklari;
• 11 ta holatda — inson omilining salbiy ta’siri sababli yuzaga kelganini ko‘rsatgan.

Inspeksiya tomonidan aniqlangan kamchiliklarni bartaraf etish yuzasidan berilgan ko‘rsatmalarga asosan vazirlik va idoralarga qarashli “O‘zbekiston temir yo‘llari” aksiyadorlik jamiyati tarkibiga kirmaydigan shoxobcha temiryo‘llarida quyidagi o‘zgarish va ijobiy natijalarga erishilgan:

• 1524,28 kilometr temiryo‘l kapital ta’mirlangan;
• 11 komplekt strelkali o‘tkazgichlar almashtirilgan;
• 1216 dona vagon kapital ta’mirlangan;
• 8 dona yangi vagon xarid qilingan;
• 35 dona lokomotiv kapital ta’mirlangan;
• 6465 dona shpal va 3,598 kilometr rels almashtirilgan.

2022-yil inspeksiya tomonidan 6 ta temiryo‘llarda tashishlar xavfsizligini ta’minlashga oid normativ-huquqiy hujjatlar va texnik jihatdan tartibga solish sohasidagi normativ hujjatlar loyihalari ishlab chiqilgan, bo‘lib ayni paytda mazkur loyihalar qabul qilish uchun kiritilgan.