Buxorodagi “ahvoli qo‘rqinchli”, bemorni battar kasal qiladigan shifoxona 580 mln so‘mga qayta ta’mirlandi (foto)

“Daryo”da 2021-yil noyabrda Buxoroning Vobkent tumanidagi “Paxtakor” oilaviy shifokorlik punktining “qo‘rqinchli” ahvoli haqida hikoya qilingandi. Mas’ullarning ma’lumot berishicha, mazkur shifoxona 580 million so‘m mablag‘ evaziga qayta ta’mirlangan.

“Shifokorlik punkti binosini barpo etish va jihozlash ishlari ‘Botirov Asadbek family’ MCHJ quruvchilari tomonidan bajarilgan bo‘lib, bunga tashabbusli budjetdan 580 million so‘m mablag‘ sarflandi. 30 nafar tibbiyot xodimining samarali ish yuritishlari uchun ham zarur shart-sharoitlar yaratildi”, — deydi Vobkent tuman tibbiyot birlashmasi boshlig‘i Shuhrat Rajabov.

Ma’lum qilinishicha, tibbiyot maskani 14 ta xonadan iborat. Ayollar, bolalar va keksalar uchun alohida xonalar, shuningdek, ijtimoiy apteka, ginekologiya, fizioterapiya, emlash, sterilizatsiya, muolaja xonasi, laboratoriya, ikkita kunduzgi statsionar xonalari tashkil qilingan. Bulardan tashqari, turli xastaliklarni erta aniqlash, malakali tibbiy xizmat ko‘rsatishda ham qator qulayliklar yaratilgan.

“Tumanda yana ta’mirga muhtoj 4 ta kapital va 5 ta joriy ta’mirga muhtoj oilaviy shifokorlik punkti mavjud. Ularning ham ta’miri rejalashtirilgan. ‘Paxtakor’ shulardan birinchisi. Tumandagi eng ko‘p sonli aholiga tibbiy xizmat ko‘rsatadigan mazkur muassasaning ta’mirlanishini jadallashtirishda ‘Daryo’ tahririyatining ishtiroki yuqori bo‘ldi. E’tibor va jamiyat hayotiga daxldorlik uchun tahririyatga minnatdorlik bildiramiz”, — dedi Shuhrat Rajabov.