Ijtimoiy tarmoqlarda yosh qizaloqning qarindoshlari qamalib, o‘zi chorasiz holda qolgani tasvirlangan videolar tarqalmoqda. Holat yuzasidan Bosh prokuratura matbuot kotibi munosabat bildirdi.
Ma’lum qilinishicha, 15-iyun kuni Andijon viloyati Asaka tumanida yashovchilar — (videotasvirdagi qizaloqning qarindoshlari) 1972-yilda tug‘ilgan M.M., 1975-yilda tug‘ilgan M.S. Asaka tumani hokimligiga kelib, 2004-yilda tug‘ilgan S.I. uchun Vazirlar Mahkamasining 2020-yil 23-iyun kungi 402-sonli qaroriga asosan oliy ta’lim muassasalariga imtiyozli o‘qishga kirishga tavsiyanoma olish maqsadida hokimlik hududida janjal ko‘tarib, Asaka tumani hokimining oila va xotin-qizlar masalalari bo‘yicha o‘rinbosari D.Aliyevani jamoat joyida boshqa tashkilot va muassasalar rahbarlari ko‘z oldida hech bir sababsiz uyatli so‘zlar bilan haqoratlab, sha’ni va qadr-qimmatini kamsitib, sochlari va kiyimlaridan tortib, urib-do‘pposlagan.
O‘tkazilgan sud-tibbiy ekspertizasi xulosasiga ko‘ra, D.Aliyevaga qisqa muddatga sog‘liq buzilishiga sabab bo‘lgan yengil tan jarohati yetkazilgan.
Bundan tashqari, yuqorida tilga olingan fuqaro M.M. 20-iyun kuni soat 15:40 da o‘g‘li A.I., qizi Z.G‘. hamda jiyani S.I. bilan Asaka tumanlararo iqtisodiy sudiga kelib, sudda “Asakabank” AJ filialidan A.I.ga tegishli bo‘lgan “Asaka Bread Svit” MCHJga 500 million so‘m kredit ajratish bo‘yicha qilgan murojaati rad etilgani sababli sud zalida “Asakabank” AJ Bobur filiali rahbari B.Haydarovni haqoratlab, sha’ni va qadr-qimmatini kamsitib, urib-do‘pposlab, o‘tkazilgan sud-tibbiy ekspertizasi xulosasiga ko‘ra, qisqa muddatga sog‘liq buzilishiga sabab bo‘lgan yengil tan jarohati yetkazib, bezorilik harakatlarini to‘xtatmoqchi bo‘lgan Milliy gvardiya xodimlariga faol qarshilik ko‘rsatgan.
Ma’lumot uchun, mazkur oila 2017-yildan buyon amaldagi qonun hujjatlarini ochiqdan ochiq buzishi, jamiyatda yurish-turish qoidalarini qasddan mensimasligi, fuqarolar va davlat idoralarining vakillari bilan deyarli har kuni turli janjallar uyushtirib yurishi, banklardan bir necha marotaba kredit mablag‘larini olishga erishib, so‘ng bank va boshqa xodimlar bilan aynan kredit qarzdorligini to‘lamaslik uchun janjallashib, ularning ustidan turli idora va tashkilotlarga tinimsiz murojaatlar yo‘llab (2020—2022-yillar mobaynida viloyat IIBning o‘ziga 64 marotaba murojaat qilgan), o‘tkazilayotgan sayyor va ommaviy qabullarga borib, notinchliklar tashkil qilib kelishi, doimiy ravishda norozi kayfiyatda yurishi bilan aholi hamda davlat idoralarining e’tiboriga tushgan.
Xususan, ayblanuvchi M.M. 2016-yil 22-yanvar kuni Jinoyat kodeksining 168-moddasi 2-qismi “b” bandi va 211-moddasi 1-qismi bilan sudlanib, 1 yil 10 oy muddatga axloq tuzatish ishlari jazosi tayinlangan, shuningdek, M.M. MJtKning 183-moddasi bilan 3 marta, 194-moddasi bilan 1 marta, 40-moddasi bilan 1 marta, 41-moddasi bilan 3 marta, 211-moddasi bilan 1 marta ma’muriy javobgarlikka tortilgan.
Hozirda fuqaro M.M. Andijon viloyatidagi banklardan jami 738 million 210 ming so‘m miqdorida kredit mablag‘larini qo‘lga kiritib, ularni qasddan to‘lamasdan kelmoqda. Uning singlisi (internet tarmoqlarida chiqishi uyushtirilgan qizchaning onasi) M.S., muqaddam 2006-yil 19-dekabr kuni Jinoyat kodeksining 109-moddasi 2-qismi bilan sudlangan.
Jinoyat ishi bo‘yicha 2022-yil 22-iyun kuni M.M., Z.G‘., A.I. va S.M. Jinoyat kodeksining 127-moddasi (voyaga yetmagan shaxsni g‘ayriijtimoiy xatti-harakatlarga jalb qilish), 140-moddasi (haqorat qilish), 277-moddasi (bezorilik) kabi moddalar bilan aybli deb topilgan va shu kunning o‘zida qamoqqa olingan. Voyaga yetmagan S.I.ga nisbatan esa uy qamog‘i tarzidagi ehtiyot choralari qo‘llanilgan.
Ayblanuvchilarning boshqa jinoyatlarga aloqadorligini aniqlash borasida olib borilgan tezkor-qidiruv tadbirlari davomida fuqaro M.M. va uning jinoiy sheriklari bo‘lgan oila a’zolari tomonidan boshqa bir qator g‘ayriqonuniy xatti-harakatlar sodir etilgani aniqlangan.
Ehtiyot chorasi tariqasida qamoqqa olingan ayblanuvchi M.S.ning ijtimoiy tarmoqlar orqali videomurojaat qilgan voyaga yetmagan qizi I.I. ayni vaqtda yaqin qarindoshlari — opasi, xolasi va uning turmush o‘rtog‘i qaramog‘iga topshirilgan.
“Bu oilaning jinoiy harakatlari haqida ma’lumot tarqatish niyatimiz yo‘q edi. Lekin o‘zlarining qabih niyatlarini amalga oshirish ilinjida jajji qizaloqdan foydalangan odamlar harakatlariga jamoatchilikning o‘zi xulosa beradi, degan umiddamiz”, — deyilgan xabarda.
Izoh (0)