Ижтимоий тармоқларда ёш қизалоқнинг қариндошлари қамалиб, ўзи чорасиз ҳолда қолгани тасвирланган видеолар тарқалмоқда. Ҳолат юзасидан Бош прокуратура матбуот котиби муносабат билдирди.
Маълум қилинишича, 15 июнь куни Андижон вилояти Асака туманида яшовчилар — (видеотасвирдаги қизалоқнинг қариндошлари) 1972 йилда туғилган М.М., 1975 йилда туғилган М.С. Асака тумани ҳокимлигига келиб, 2004 йилда туғилган С.И. учун Вазирлар Маҳкамасининг 2020 йил 23 июнь кунги 402-сонли қарорига асосан олий таълим муассасаларига имтиёзли ўқишга киришга тавсиянома олиш мақсадида ҳокимлик ҳудудида жанжал кўтариб, Асака тумани ҳокимининг оила ва хотин-қизлар масалалари бўйича ўринбосари Д.Алиевани жамоат жойида бошқа ташкилот ва муассасалар раҳбарлари кўз олдида ҳеч бир сабабсиз уятли сўзлар билан ҳақоратлаб, шаъни ва қадр-қимматини камситиб, сочлари ва кийимларидан тортиб, уриб-дўппослаган.
Ўтказилган суд-тиббий экспертизаси хулосасига кўра, Д.Алиевага қисқа муддатга соғлиқ бузилишига сабаб бўлган енгил тан жароҳати етказилган.
Бундан ташқари, юқорида тилга олинган фуқаро М.М. 20 июнь куни соат 15:40 да ўғли А.И., қизи З.Ғ. ҳамда жияни С.И. билан Асака туманлараро иқтисодий судига келиб, судда «Асакабанк» АЖ филиалидан А.И.га тегишли бўлган «Асака Бреад Свит» МЧЖга 500 миллион сўм кредит ажратиш бўйича қилган мурожаати рад этилгани сабабли суд залида «Асакабанк» АЖ Бобур филиали раҳбари Б.Ҳайдаровни ҳақоратлаб, шаъни ва қадр-қимматини камситиб, уриб-дўппослаб, ўтказилган суд-тиббий экспертизаси хулосасига кўра, қисқа муддатга соғлиқ бузилишига сабаб бўлган енгил тан жароҳати етказиб, безорилик ҳаракатларини тўхтатмоқчи бўлган Миллий гвардия ходимларига фаол қаршилик кўрсатган.
Маълумот учун, мазкур оила 2017 йилдан буён амалдаги қонун ҳужжатларини очиқдан очиқ бузиши, жамиятда юриш-туриш қоидаларини қасддан менсимаслиги, фуқаролар ва давлат идораларининг вакиллари билан деярли ҳар куни турли жанжаллар уюштириб юриши, банклардан бир неча маротаба кредит маблағларини олишга эришиб, сўнг банк ва бошқа ходимлар билан айнан кредит қарздорлигини тўламаслик учун жанжаллашиб, уларнинг устидан турли идора ва ташкилотларга тинимсиз мурожаатлар йўллаб (2020—2022 йиллар мобайнида вилоят ИИБнинг ўзига 64 маротаба мурожаат қилган), ўтказилаётган сайёр ва оммавий қабулларга бориб, нотинчликлар ташкил қилиб келиши, доимий равишда норози кайфиятда юриши билан аҳоли ҳамда давлат идораларининг эътиборига тушган.
Хусусан, айбланувчи М.М. 2016 йил 22 январь куни Жиноят кодексининг 168-моддаси 2-қисми «б» банди ва 211-моддаси 1-қисми билан судланиб, 1 йил 10 ой муддатга ахлоқ тузатиш ишлари жазоси тайинланган, шунингдек, М.М. МЖтКнинг 183-моддаси билан 3 марта, 194-моддаси билан 1 марта, 40-моддаси билан 1 марта, 41-моддаси билан 3 марта, 211-моддаси билан 1 марта маъмурий жавобгарликка тортилган.
Ҳозирда фуқаро М.М. Андижон вилоятидаги банклардан жами 738 миллион 210 минг сўм миқдорида кредит маблағларини қўлга киритиб, уларни қасддан тўламасдан келмоқда. Унинг синглиси (интернет тармоқларида чиқиши уюштирилган қизчанинг онаси) М.С., муқаддам 2006 йил 19 декабрь куни Жиноят кодексининг 109-моддаси 2-қисми билан судланган.
Жиноят иши бўйича 2022 йил 22 июнь куни М.М., З.Ғ., А.И. ва С.М. Жиноят кодексининг 127-моддаси (вояга етмаган шахсни ғайриижтимоий хатти-ҳаракатларга жалб қилиш), 140-моддаси (ҳақорат қилиш), 277-моддаси (безорилик) каби моддалар билан айбли деб топилган ва шу куннинг ўзида қамоққа олинган. Вояга етмаган С.И.га нисбатан эса уй қамоғи тарзидаги эҳтиёт чоралари қўлланилган.
Айбланувчиларнинг бошқа жиноятларга алоқадорлигини аниқлаш борасида олиб борилган тезкор-қидирув тадбирлари давомида фуқаро М.М. ва унинг жиноий шериклари бўлган оила аъзолари томонидан бошқа бир қатор ғайриқонуний хатти-ҳаракатлар содир этилгани аниқланган.
Эҳтиёт чораси тариқасида қамоққа олинган айбланувчи М.С.нинг ижтимоий тармоқлар орқали видеомурожаат қилган вояга етмаган қизи И.И. айни вақтда яқин қариндошлари — опаси, холаси ва унинг турмуш ўртоғи қарамоғига топширилган.
«Бу оиланинг жиноий ҳаракатлари ҳақида маълумот тарқатиш ниятимиз йўқ эди. Лекин ўзларининг қабиҳ ниятларини амалга ошириш илинжида жажжи қизалоқдан фойдаланган одамлар ҳаракатларига жамоатчиликнинг ўзи хулоса беради, деган умиддамиз», — дейилган хабарда.
Изоҳ (0)