AQSH mamlakat vakillar palatasi spikeri Nensi Pelosining Tayvanga tashrifi oqibatlari qanday bo‘lishini tushunishi kerak, bu ikki davlat o‘rtasidagi aloqalarga putur yetkazadi. Bu haqda Xitoy Xalq Respublikasining BMTdagi doimiy vakili Chjan Szyuan 1-avgust kungi matbuot anjumanida aytib o‘tdi, deb yozadi “RBK”.
“Bu mamlakatlar o‘rtasidagi aloqalarga putur yetkazadi. Biz Tayvan masalasida har qanday ayirmachilik harakatlariga, shuningdek, XXRning ichki ishlariga aralashuvga qat’iy qarshi turamiz”, — dedi diplomat.
Doimiy vakilning qayd etishicha, Xitoyning hududiy yaxlitligi masalasi mamlakat uchun qizg‘in bo‘lib turibdi va u Xitoy tomoni hech kimning kesib o‘tishiga yo‘l qo‘ymaydigan “qizil chiziq” hisoblanadi.
AQSH Kongressi Vakillar palatasi spikeri Nensi Pelosi o‘zining Osiyo mamlakatlari bo‘ylab safari doirasida baribir Tayvanga tashrif buyurishi haqida CNN Tayvan va AQSH rahbariyatlaridagi manbalariga tayanib ma’lum qildi.
Pelosi Oq uyning ogohlantirishlariga qaramasdan, orolga uchib kelmoqchi, u Tayvanda bir kecha qolmoqchi. Ammo bu qachon bo‘lishi noma’lum. Ayni paytda Pelosi Singapurda bo‘lib turibdi.
Pelosining Osiyo safari dasturiga rasman Malayziya, Singapur, Yaponiya va Janubiy Koreya kiritilgan.
Pelosining Tayvanga tashrifiga Xitoy keskin qarshilik ko‘rsatmoqda. Xitoy ijtimoiy tarmoqlarida Pelosining samolyoti Tayvan havo hududiga kirsa, uni urib tushirishga da’vatlar paydo bo‘ldi. Xitoy yetakchisi Si Szinpin AQSH prezidenti Jo Bayden bilan suhbatda Vashingtonni “o‘t bilan o‘ynashmaslik”ka chaqirgandi.
Pelosi AQSH Kongressi Vakillar palatasining so‘nggi 25 yil ichida Tayvanga tashrif buyurgan birinchi spikeriga aylanishi mumkin.
Tayvan Xitoydan ajralib chiqqani haqida 1949-yilda, fuqarolar urushi davrida e’lon qilgan. Pekin orolning mustaqilligini tan olmaydi va uni o‘z provinsiyasi deb hisoblaydi. AQSH orolda e’lon qilingan Xitoy respublikasi bilan diplomatik aloqalar o‘rnatmagan bo‘lsa-da, 1979-yildan buyon amal qilib keluvchi qonunga ko‘ra, mintaqaga o‘zini himoyalash uchun qurol yetkazib bera oladi.
Izoh (0)