Si Szinpin Baydenni “o‘t bilan o‘ynashgan kuyib qolishi” haqida ogohlantirdi

Xitoy raisi va mamlakat kompartiyasi bosh kotibi Si Szinpin Tayvan mintaqasida keskinlik oshayotgan bir paytda AQSH prezidenti Jo Baydenni “olov bilan o‘ynashgan odam kuyib qolishi” haqida ogohlantirdi, deb yozadi “RBK”.

Uning ta’kidlashicha, Xitoy xalqi Tayvan masalasida “Xitoyning milliy suvereniteti va hududiy yaxlitligini qat’iy himoya qilish kayfiyatida”. U orolning o‘zi tomonidan e’lon qilingan mustaqilligini tan olmasligini qo‘shib qo‘ydi.

Bayden, o‘z navbatida, AQSH “yagona Xitoy” siyosatiga sodiqligiga ishontirgan. Shunga qaramay, Bloomberg agentligi AQSH Davlat departamenti bayonotida ushbu suhbat, avvalgi qo‘ng‘iroqlardan farqli ravishda, “konstruktiv” deb atalmaganiga e’tibor qaratdi.

28-iyul, payshanba kuni Bayden Si Szinpin bilan ikki soatlik muzokaralar o‘tkazdi. AQSH Milliy xavfsizlik kengashining strategik kommunikatsiyalar bo‘yicha koordinatori Jon Kirbi suhbat mavzusini oshkor qilmadi.

CNN ma’lumotlariga ko‘ra, bu ikki mamlakat yetakchilarining 2022-yil boshidan buyon beshinchi marta qo‘ng‘iroqlashishidir.

Xitoy va AQSH o‘rtasidagi keskin munosabatlar bir necha yildan buyon saqlanib qolmoqda. Chunonchi, Donald Tramp prezidentligi davrida Vashington, shu jumladan, Tayvan masalasi tufayli Pekinga sanksiyaviy bosimni kuchaytirgandi. Tayvan atrofidagi vaziyat so‘nggi vaqtlarda AQSH vakillar palatasi spikeri Nensi Pelosining yaqin orada orolga tashrif buyurish rejasi sababli keskinlashdi.

Xitoy AQSH rahbariyatini bir necha marta tashrifdan voz kechishga chaqirib, “yagona Xitoy” siyosatiga sodiqlik AQSH zimmasiga yuklaydigan majburiyatlar haqida eslatdi.

Agar Pelosining tashrifi amalga oshsa, u 25 yil ichida Tayvanga tashrif buyurgan birinchi AQSH kongressi palatasi spikeriga aylanadi.

Shu bilan birga, AQSH prezidenti harbiylar ushbu tashabbusni maqbul deb hisoblamasligini aytdi. CNN ma’lumotlariga ko‘ra, Oq uy Xitoy Pelosining tashrifini chippakka chiqarish uchun Tayvan havo hududini parvozdan tashqari zona deb e’lon qilishidan xavotirda. Shuningdek, Pekin orolga qiruvchi samolyotlarni yo‘naltirishi, bu esa Taybey va Vashingtonning javob choralariga sabab bo‘lishi mumkin.

XXR Tashqi ishlar vazirligi Pelosining ehtimoliy tashrifiga “jiddiy tayyorgarlik” ko‘rayotganini ma’lum qildi.

Tayvan Xitoydan ajralib chiqqani haqida 1949-yilda, fuqarolar urushi davrida e’lon qilgan. Pekin orolning mustaqilligini tan olmaydi va uni o‘z provinsiyasi deb hisoblaydi. AQSH orolda e’lon qilingan Xitoy respublikasi bilan diplomatik aloqalar o‘rnatmagan bo‘lsa-da, 1979-yildan buyon amal qilib keluvchi qonunga ko‘ra, mintaqaga o‘zini himoyalash uchun qurol yetkazib bera oladi.