AQSHning Xitoy va Tayvanga nisbatan xavotirlari ortib bormoqda — NYT
AQSH rasmiylari Xitoyning Tayvanga nisbatan xatti-harakatlari va bayonotlaridan tobora ko‘proq tashvishlanmoqda, so‘nggi kunlarda Vakillar palatasi spikeri Nensi Pelosining orolga tashrif buyurish niyati tufayli vaziyat keskinlashdi, Oq uydagilar maxfiy ravishda uni safardan qaytarishga urinmoqda. Bu haqda The New York Times manbalarga tayanib yozmoqda.
Pelosining Tayvanga tashrifi mojaro xavfini oshiradi, chunki yaqin haftalarda Xitoy raisi Si Szinpin va Xitoy Kommunistik partiyasining (XKP) boshqa yetakchilari o‘rtasidagi “muhim siyosiy uchrashuv” bo‘lib o‘tadi, deya ta’kidladi AQSH rasmiylari. NYT gazetasi bu qanday uchrashuv ekaniga aniqlik kiritmagan, biroq XKPning 20-Kongressi 2022-yilning ikkinchi yarmiga belgilangan edi.
Gazetaning yozishicha, Pelosi katta ehtimol bilan Tayvanga AQSH harbiy samolyotida uchadi, chunki bu shunday tashriflar uchun odatiy hol. Bir qator tahlilchilarning fikricha, Xitoy Amerika samolyotini kuzatib borish va uning qo‘nishiga xalal berish uchun maxsus samolyot jo‘natishi mumkin, deb ta’kidlamoqda The New York Times. Gazetaga intervyu bergan AQSH rasmiylarining aytishicha, bunday harakatga xavotirli va keskinlikning jiddiylashishi deb qaraladi, ammo aynan shu ssenariy kuzatilishi hozircha dargumon.
Reuters xabariga ko‘ra, Pelosi Yaponiyaga tashrifidan so‘ng, shu hafta Tayvanga tashrif buyurish niyatida. Vakillar palatasi spikerining o‘zi “Tayvanni qo‘llab-quvvatlashini ko‘rsatish” muhimligini aytib, rejalariga omma oldida izoh berishdan bosh tortgan. Orolga tashrif buyurgan taqdirda, Pelosi 1997-yildan beri 25 yil ichida Tayvanga tashrif buyurgan birinchi AQSH Kongressi spikeri bo‘ladi.
Xitoy tashqi ishlar vazirligi Pelosining ehtimoliy tashrifiga “jiddiy tayyorgarlik ko‘rilayotgani” haqida ma’lum qildi, deb xabar beradi Bloomberg. “Xitoy tomoni Amerika tomoniga spiker Pelosining Tayvanga ehtimoliy tashrifidan jiddiy xavotirimizni va bu tashrifga keskin qarshi ekanligimizni bir necha bor bildirdi”, — degan vazirlik matbuot kotibi Chjao Litszyan 25-iyul kuni bo‘lib o‘tgan brifingda.
Financial Times nashrining yozishicha, Xitoy rasmiylari shaxsiy ravishda AQSHga Pelosining orolga tashrifi oqibatlari haqida ogohlantirish yuborgan, unda avvalgidan ancha jiddiyroq tahdidlar mavjud. Maktub matni harbiy javobga sabab bo‘la oladi, dedi gazetaga masaladan xabardor ikki kishi.
