Toshkentning Olmazor tumanida 5 yoshli bolaning o‘limi bilan yakunlangan YTH yuz berdi.
Poytaxt IIBB matbuot xizmati xabariga ko‘ra, voqea 30-iyul kuni taxminan soat 15:30 larda sodir bo‘lgan. Haydovchi A.Sh. (2001-yilda tug‘ilgan) Matiz’da Olmazor tumani Farobiy ko‘chasi bo‘ylab harakatlanayotganda yo‘lning qarama-qarshi qismiga chiqib ketgan va 14-sonli oilaviy poliklinika qarshisida yo‘lni kesib o‘tayotgan 1988-yilda tug‘ilgan T.N. va voyaga yetmagan 2017-yilda tug‘ilgan X.M.ni urib yuborgan.
Ular Respublika shoshilinch tez tibbiy yordam ilmiy markazi shifoxonasiga yotqazilgan, biroq shifokorlarning urinishlariga qaramay, 5 yoshli bola shifoxonada vafot etgan.
Mazkur holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan.
Haydovchi A.Sh.ga nisbatan qamoqqa olish ehtiyot chorasi tanlangan. Tergov harakatlari davom etmoqda.
Izoh (0)