Тошкентнинг Олмазор туманида 5 ёшли боланинг ўлими билан якунланган ЙТҲ юз берди.
Пойтахт ИИББ матбуот хизмати хабарига кўра, воқеа 30 июль куни тахминан соат 15:30 ларда содир бўлган. Ҳайдовчи А.Ш. (2001 йилда туғилган) Matiz’да Олмазор тумани Фаробий кўчаси бўйлаб ҳаракатланаётганда йўлнинг қарама-қарши қисмига чиқиб кетган ва 14-сонли оилавий поликлиника қаршисида йўлни кесиб ўтаётган 1988 йилда туғилган Т.Н. ва вояга етмаган 2017 йилда туғилган Х.М.ни уриб юборган.
Улар Республика шошилинч тез тиббий ёрдам илмий маркази шифохонасига ётқазилган, бироқ шифокорларнинг уринишларига қарамай, 5 ёшли бола шифохонада вафот этган.
Мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси 2-қисми билан жиноят иши қўзғатилган.
Ҳайдовчи А.Ш.га нисбатан қамоққа олиш эҳтиёт чораси танланган. Тергов ҳаракатлари давом этмоқда.
Изоҳ (0)