DXX O‘zbekistonning bir nechta viloyatida narkotiklar kontrabandasiga chek qo‘ydi, deb xabar bermoqda O‘zA.
DXXning Surxondaryo viloyati bo‘yicha boshqarmasi xodimlari tomonidan o‘tkazilgan tezkor tadborda Termiz tumanida yashovchi, 1983 va 1986-yillarda tug‘ilgan 2 nafar fuqaro 2 kilogramm 60 gramm opiy moddasini 40 ming dollarga sotgan vaqtlarida DXX xodimlari tomonidan qo‘lga olingan.
Shuningdek, ular Tojikistondan keltirilgan ushbu giyohvandlik vositasini Termiz shahrida istiqomat qiluvchi, 1989-yilda tug‘ilgan fuqarodan 28 ming dollarga sotib olgani aniqlanib, u ham ushlangan.
DXX Sirdaryo viloyati bo‘yicha boshqarmasi xodimlari va Chegara qo‘shinlari harbiy xizmatchilari hamkorligida o‘tkazilgan tezkor tadbirda Bekobod—Guliston yo‘nalishida harakatlanayotgan Nexia Boyovut tumanida to‘xtatilib, ko‘zdan kechirilganda, unda yo‘lovchi sifatida ketayotgan, Tojikiston fuqarosi bo‘lgan shaxs (1964-yilda tug‘ilgan) yonida 1 kilogramm opiy giyohvandlik vositasi borligi aniqlanib, tegishli tartibda rasmiylashtirib olingan. Aniqlanishicha, u mazkur narkotikni Qozog‘istonga o‘tkazishni rejalashtirgan.
Farg‘ona shahrida yashovchi, Tojikiston fuqarosi (1988-yilda tug‘ilgan) esa o‘zining shar’iy nikohidagi turmush o‘rtog‘i bo‘lgan, ayol (1992-yilda tug‘ilgan) bilan Surxondaryo viloyatining Denov tumaniga borib, Tojikistondagi narkosavdogardan 11 ming dollarga sotib olingan 976 gramm opiy va 994 gramm gashish giyohvand moddalarini kontrabanda yo‘li bilan mamlakatimiz hududiga o‘tkazadi. So‘ngra ular narkotik moddalarni olib qaytayotgan vaqtlarida Marg‘ilon shahrida DXX Farg‘ona viloyati bo‘yicha boshqarmasi xodimlari tomonidan ushlangan.
Boshqa holatda esa Yozyovon tumanidan Marg‘ilon shahri tomon harakatlanayotgan Lacetti to‘xtatilib, ko‘zdan kechirilgan. Natijada unda yo‘lovchi sifatida ketayotgan, Marg‘ilon shahrida yashovchi, 1979 va 1983-yillarda tug‘ilgan, muqaddam sudlangan 2 nafar fuqaroning yonida Qirg‘izistondan olib kelingan 698 gramm opiy borligi aniqlanib, protsessual tartibda rasmiylashtirib olingan.
DXX Toshkent viloyati bo‘yicha boshqarmasi hamda viloyat bojxona boshqarmasi xodimlari tomonidan Bekobod shahrida o‘tkazilgan tezkor tadbirda esa Tojikistonning So‘g‘d viloyati Mastchoh tumanida yashovchi, shaxs (1977-yilda tug‘ilgan) 1 kilogramm 961 gramm gashish moddasini shartli xaridorga sotgan vaqtida qo‘lga olingan.
Bu yo‘nalishda DXX Namangan viloyati bo‘yicha boshqarmasi xodimlari tomonidan ham viloyat bojxona boshqarmasi bilan hamkorlikda o‘tkazilgan tezkor tadbirda Yangiqo‘rg‘on tumanida harakatlanayotgan Cobalt to‘xtatilib, tekshiruvdan o‘tkazilgan.
Natijada unda yo‘lovchi sifatida ketayotgan, Namangan shahrida yashovchi fuqaroning (1966-yilda tug‘ilgan) yonida 968 gramm gashish borligi aniqlangan.
U mazkur narkotik moddani Qirg‘izistondagi tanishidan 7 ming dollarga sotib olib, uchinchi shaxslar imkoniyatlari orqali Yangiqo‘rg‘on tumani hududiga kontrabanda yo‘li bilan o‘tkazgan.
Qayd etilishicha, hozirda barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.