Toshkentda ayol sobiq sevgilisi tomonidan zo‘ravonlikka uchrayotganini aytib “Nemolchi.uz”ga murojaat bilan chiqdi. Ayolning aytishicha, bu bo‘yicha huquqni muhofaza organlariga bir necha bor ariza bilan chiqqan, lekin erkakning katta joyda ishlaydigan tanishlari borligi uchun bu hech qanday natija bermagan.
Quyida ayolning murojaatini keltiramiz.
“Kimga murojaat qilishni bilmay sizga (Nemolchi.uz’ga – tahr.) o‘zim bilan bo‘lgan voqeani aytmoqchiman. Men “Na Chile” restoranining egasi Oybek Isabayev Baxtiyarovich bilan fuqarolik nikohida edim. Mening undan 3 yoshli qizim bor. Shu yillar davomida ma’naviy va jismoniy zo‘ravonlikka duchor bo‘ldim, kaltaklandim, xo‘rlandim.
Lekin men undan uzoqlasha olmadim, chunki Oybek meni orqamdan tinmay ta’qib qilardi. Men bir necha marta IIBga murojaat qildim, lekin u hamma narsani pul va tanishlari bilan hal qildi.
Olti oy oldin biz alohida yashay boshladik, chunki u o‘ziga boshqa ayolni topib olgandi. Shundan so‘ng men bu odamdan qutuldim deb o‘ylagandim, xato o‘ylagan ekanman. Avvalgi zo‘ravonliklar battar yomonlashdi.
Bu erkak mashinamga GPS qo‘yib olib, ta’qib qiladi. Boshqa ayol bilan yashab, meni bolamning ko‘z o‘ngida kaltaklaydi, haqorat qiladi, xo‘rlaydi, mulkimni talon-toroj qiladi. U meni do‘q-po‘pisalar bilan manipulyatsiya qilib, o‘ldiraman, sochingni qirdiraman, deydi.
Menda sizlardan boshqa murojaat qiladigan boshqa hech kim yo‘q. Mening otam yo‘q, yordam beradigan biron tanishim yo‘q. Menga rahm qiladigan hech kim yo‘q... Hozir u meni qo‘rqitishda davom etmoqda. Kecha u mashinamni rasvo qildi, undan oldin telefonimni sindirib tashladi.
Men yolg‘iz onaman, onam va bolam bilan yashayman, oilamni o‘zim ta’minlayman. Kecha men IIB xodimiga ariza bilan murojaat qildim. Ammo haligacha hech kim menga qo‘ng‘iroq qilmadi. Iltimos yordam bering!”, – deydi murojaatchi ayol.
Ushbu holat bo‘yicha “Nemolchi.uz” adolat qaror topishini talab qilgan.
“O‘zbekistonda adolatning narxi qancha? Kaltaklangani haqidagi arizani va zo‘ravonlikni bosdi-bosdi qilish qancha turadi? Ayolni kaltaklash qancha turadi? Balki huquq-tartibot idoralari bu bo‘yicha tariflarni e’lon qilishar? Axir, bu IIO xodimlarining harakatsizligi tufayli davom etmoqda!”, – deyiladi xabarda.
Holat yuzasidan AOKA rahbari quyidagicha bayonot bilan chiqdi.
“Agentlik mamlakatimiz aholisining, ayniqsa, xotin-qizlarning shaxsini obro‘sizlantirish, ularning hayoti, sog‘lig‘i, erkini hamda qonun bilan himoya qilinadigan boshqa huquq va erkinliklariga tajovuz qilishga bo‘lgan urinishlarni keskin qoralaydi.
Eslatib o‘tish joiz, mamlakatimiz qonunchiligida xotin-qizlar huquqlarini ta’minlash, xususan, ayollarni tazyiq va zulmdan himoya qilishga oid masalalar qator normalar bilan mustahkamlab qo‘yilgan hamda ularga nisbatan zo‘ravonlik sodir etganlik uchun qat’iy jazolar belgilangan.
AOKA ushbu yo‘nalishda vakolatli bo‘lgan mas’ul tashkilotlar va idoralardan jamoatchilik muhokamalariga sabab bo‘layotgan voqeaga e’tibor qaratishlari, holatni chuqur o‘rganishlarini so‘rab qoladi.
Agentlik hodisa yuzasidan tegishli davlat organlariga so‘rov yuborishini ma’lum qiladi”.
Izoh (0)