Samarqand, Namangan va Andijon viloyatlarida yer savdosi bilan bog‘liq firibgarlik holatlari fosh etildi. Bu haqda Iqtisodiy jinoyatlarga qarshi kurashish departamenti xabar berdi.
Unga ko‘ra, bosh prokuratura huzuridagi departamentning Jomboy tumani bo‘limi tomonidan tezkor tadbir o‘tkazilgan. Unda fuqarolar A.SH. va I.X. fuqaro Z.ning xabardorligisiz unga qarashli 5 sotix yer maydonini hamda ushbu hududga tutash hokimlik zaxirasidagi yana 5 sotix yer maydonini boshqa bir fuqaro I.ga firibgarlik yo‘li bilan 11 000 dollarga sotishga kelishib, shundan 10 800 dollarni olgan vaqtida ashyoviy dalillar bilan ushlangan.
Departament hamda DXXning To‘raqo‘rg‘on tumani bo‘limlari tomonidan o‘tkazilgan tezkor tadbirda fuqaro SH.I. fuqaro R.ga “CH.B.” fermer xo‘jaligi foydalanuvida bo‘lgan yer maydonining o‘ziga tegishli ekanini aytib, ushbu yer maydonini unga rasmiylashtirib berish evaziga 3200 dollar va 75 million so‘mni olgan vaqtida ashyoviy dalillar bilan ushlangan.
Andijon shahrida o‘tkazilgan tergovga qadar tekshiruvda esa muqaddam sudlangan E.P. fuqaro D.ning ishonchiga kirib, Xo‘jaobod tumani hududida go‘yoki 8 sotix yer maydoni uning onasiga meros bo‘lib qolganini aytib, ushbu yer maydonini uning nomiga rasmiylashtirib berishni va’da qilib, jami 4250 dollarni firibgarlik yo‘li bilan olgani aniqlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)