Самарқанд, Наманган ва Андижон вилоятларида ер савдоси билан боғлиқ фирибгарлик ҳолатлари фош этилди. Бу ҳақда Иқтисодий жиноятларга қарши курашиш департаменти хабар берди.
Унга кўра, бош прокуратура ҳузуридаги департаментнинг Жомбой тумани бўлими томонидан тезкор тадбир ўтказилган. Унда фуқаролар А.Ш. ва И.Х. фуқаро З.нинг хабардорлигисиз унга қарашли 5 сотих ер майдонини ҳамда ушбу ҳудудга туташ ҳокимлик захирасидаги яна 5 сотих ер майдонини бошқа бир фуқаро И.га фирибгарлик йўли билан 11 000 долларга сотишга келишиб, шундан 10 800 долларни олган вақтида ашёвий далиллар билан ушланган.
Департамент ҳамда ДХХнинг Тўрақўрғон тумани бўлимлари томонидан ўтказилган тезкор тадбирда фуқаро Ш.И. фуқаро Р.га «Ч.Б.» фермер хўжалиги фойдаланувида бўлган ер майдонининг ўзига тегишли эканини айтиб, ушбу ер майдонини унга расмийлаштириб бериш эвазига 3200 доллар ва 75 миллион сўмни олган вақтида ашёвий далиллар билан ушланган.
Андижон шаҳрида ўтказилган терговга қадар текширувда эса муқаддам судланган Э.П. фуқаро Д.нинг ишончига кириб, Хўжаобод тумани ҳудудида гўёки 8 сотих ер майдони унинг онасига мерос бўлиб қолганини айтиб, ушбу ер майдонини унинг номига расмийлаштириб беришни ваъда қилиб, жами 4250 долларни фирибгарлик йўли билан олгани аниқланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)