“Bank mas’uli fuqarodan tirikligini tasdiqlovchi hujjat so‘rab to‘g‘ri qilgan”. “Agrobank” jamoatchilikni qiziqtirgan masalaga munosabat bildirdi

Qashqadaryo viloyatining Qarshi shahrida bank mas’uli kredit olish niyatida borgan suhbatdoshidan tirikligini isbotlovchi hujjat so‘ragani haqida xabar berilgandi. “Agrobank” axborot xizmati mazkur holatga munosabat bildirib, tirik insondan shu mazmundagi hujjat talab qilinganini tasdiqladi.

“Ushbu murojaatga asosan bankning kredit ma’lumotlar bazasi orqali fuqaroga doir ma’lumotlar tekshirilganda uning vafot etganligi qayd etilgani aniqlangan. Bunga ushbu fuqaroning uzoq yillar davomida o‘zi haqida biror-bir xabar bermasdan Rossiya Federatsiyasiga ketib qolganligi, turmush o‘rtog‘i esa o‘rtalaridagi mol-mulkni sotish maqsadida uning vafot etganligi haqida noto‘g‘ri ma’lumot tarqatib, davlat notarial idorasi tomonidan ushbu ma’lumot tasdiqlanganligi sabab bo‘lgan.

Shuning uchun bank mas’uli uning tirikligini (FHDY idoralaridan uning nomiga o‘lganligi haqida guvohnoma berilmaganligi va yashash manzili MFY va IIB pasport bo‘linmasidan ushbu fuqaro aynan Anvar Javharov ekanligini) tasdiqlovchi ma’lumotlarni so‘ragan va huquqan bank mas’ulining harakatlari to‘g‘ri bo‘lgan”, — deyiladi bank axborot xizmati tarqatgan rasmiy munosabatda.

Bank mas’ullari, shuningdek, Fuqarolik kodeksi talablariga ko‘ra, fuqaro Anvar Javharov yuridik ahamiyatga ega bo‘lgan faktlarni belgilash tartibi asosida o‘zining tirikligi faktini belgilash haqida fuqarolik ishlari bo‘yicha sudga murojaat qilishi lozimligi va sud tomonidan ushbu ariza qanoatlantirilgach, uning barcha mulkiy huquqlari qayta tiklanishi, kredit olish masalasi ijobiy hal qilinishi mumkinligini ta’kidlagan.

Eslatib o‘tamiz, “Daryo”da o‘zining tirikligini isbotlashga urinayotgan Anvar Javharov haqida maqola e’lon qilingandi. Maqolada rasman 1998-yilda “o‘lgan” qashqadaryolik adolat izlayotgani, tirikligini isbotlashga urinayotgani ma’lum qilingandi. Aynan shu fuqaro keyinchalik notarius hamda shahar prokurorini obro‘sizlantirish, ularga tuhmat qilganlikda ayblanib, sud qilingandi.