Bugun,

  • USD 11095.31
  • RUB 173.84
  • EUR 10772.44

Qashqadaryo viloyatining Qarshi shahrida hujjatlarda 1998-yil “o‘lgan” Anvar Javharov notarius hamda shahar prokurorini obro‘sizlantirish, ularga tuhmat qilganlikda ayblanmoqda. Bu haqda hujjatlarda “o‘lgan” fuqaro sud qilingan jarayonda qatnashgan “Daryo” muxbiri xabar berdi.

Foto: “Daryo” / Otabek Qo‘ldoshev

Foto: “Daryo” / Otabek Qo‘ldoshev

Sudda ta’kidlanishicha, o‘zining tirikligini isbotlashga urinib, “Mening yurtim” telekanalining “Markaziy studiya” ko‘rsatuvida chiqish qilgan Anvar Javharov uning “o‘lik” ekani haqida dalolat beruvchi soxta hujjatga asoslanib, uyini oldi-sotdi qilgan notarius “R.O‘.ga nisbatan Qarshi shahar prokurori A.H. hech qanday chora ko‘rmayapti, ular bir-biriga quda”, degan ma’lumotni aytgan. Bu esa bir-biriga hech qanday qarindoshchiligi bo‘lmagan notarius hamda shahar prokurori sha’nini toptagan.

Anvar Javharovni Jinoyat kodeksining 139-moddasi 3-qismi “g” bandi (Nashr qilish yoki boshqacha usulda ko‘paytirilgan tarzda, shu jumladan, ommaviy axborot vositalarida, telekommunikatsiya tarmoqlarida yoki internet jahon axborot tarmog‘ida joylashtirish orqali g‘arazgo‘ylik yoki boshqa past niyatlarda tuhmat qilish) bilan ayblagan Qarshi shahar 2-sonli IIB tergov bo‘limi tergovchisi ta’biri bilan aytganda g‘arazgo‘ylik yoki boshqa past niyatlarda tuhmat qilgan. Tabiiyki, sudlanuvchi Javharov sudda buni tamoman rad qilgan.

“Men faqat va faqat o‘zimning tirikligimni isbotlashga, haq-huquqlarimni poymol qilganlarga chora ko‘rilishiga uringanman”, — deydi sudda so‘z olgan Anvar Javharov.

Foto: “Daryo” / Otabek Qo‘ldoshev

Foto: “Daryo” / Otabek Qo‘ldoshev

Ma’lum bo‘lishicha, 1965-yil Qarshi shahrida tug‘ilgan Anvar Javharov shahar Mudofaa ishlari bo‘limida yuritilgan hisob kartochkasining qo‘shimcha ma’lumotlar bandida 1998-yil 23-iyun kuni vafot etgan deya yozilgan. Bu ma’lumot bo‘limga 2008-yil 30-iyun kundagi 751-kirim raqamli hujjat asos bo‘lgan. Javharovning aytishicha, uning o‘limi haqidagi hujjat va ayolining soxta ishonchnoma tayyorlashi oqibatida keyinchalik u boridan ayrilgan.

“Turmush o‘rtog‘im Shahodat Sharipovaga berilgan ishonchnoma soxta, undagi imzo menga tegishli emas. Mening imzoimni soxtalashtirishdan maqsad uyimni sotib yuborish bo‘lgan. Va bunga erishishgan”, — deydi “Daryo” muxbiriga bu haqda ma’lumot bergan sudlanuvchi.

Jinoyat ishlari bo‘yicha Chiroqchi tuman sudi sudyasi O‘ktam Rasulov raisligida ko‘rib chiqilayotgan sudda OAV vakillari, xususan, “Daryo” muxbirining video hamda audioyozuv olishiga ruxsat etilmadi. Ammo fotomateriallar to‘planishiga ruxsat berildi.

Sud noma’lum muddatga tanaffus e’lon qildi.

Izoh
Asosiy yangiliklar
Mahalliy
Elektr va gazdan shikoyat qilgan fuqarolarni qamoq bilan “ogohlantirgan” deputat o‘z xohishiga ko‘ra ariza yozdi
Mahalliy
O‘zbekistonda ko‘chmas mulk, avtomototransportni boshqa shaxsga o‘tkazishda davlat boji miqdorlari kamaytirildi
Mahalliy
Qarshida Cobalt haydovchisi 13 yoshli qizni urib yuborib, voqea joyidan qochib ketdi (video)