AQSH Davlat departamenti va Moliya vazirligi vakillari Afg‘onistonda bir yildan buyon hokimiyat tepasida turgan “Tolibon” tashkiloti vakillari bilan afg‘on hududida gumanitar masalalarni hal qilish masalasida uchrashuv o‘tkazdi, deb yozadi “RBK”.
Uchrashuv 27-iyul kuni Toshkentda, Afg‘oniston bo‘yicha xalqaro konferensiya doirasida bo‘lib o‘tdi. AQSH tomonidan u yerda ushbu mamlakat bo‘yicha maxsus vakil Tomas Uest hamda moliya vazirining terrorizmga qarshi kurash va moliyaviy razvedka bo‘yicha o‘rinbosari Brayan Nelson, toliblar tomonidan esa harakatning yuqori mansabli vakillari qatnashdi.
“AQSH Afg‘onistondagi shoshilinch gumanitar vaziyatni hal qilish zarurligini ma’lum qildi. Ikkala tomon ham Afg‘oniston Markaziy bankining 3,5 milliard dollarlik litsenziyalangan zaxiralari afg‘on xalqi manfaatlari yo‘lida ishlatilishiga yo‘naltirilgan joriy sa’y-harakatlarni muhokama qildi”, — deyiladi Davlat departamenti xabarida.
Afg‘onistonning Khaama Press agentligi “Tolibon”ning Tashqi ishlar vazirligi vakiliga tayanib yozishicha, Vashington bilan uchrashuvda “Afg‘onistonning muzlatilgan aktivlari, iqtisodiy barqarorlik, gumanitar yordam va boshqa ayrim iqtisodiy masalalar” muhokama qilingan. Toliblar delegatsiyasi Afg‘onistonning muzlatib qo‘yilgan pullari berilishini talab qilgan.
“Tolibon” Afg‘onistonda hokimiyat tepasiga 2021-yil avgustida, 2011-yildan buyon mamlakat hududida bo‘lib turgan Amerika harbiy kontingenti ketganidan keyin, Afg‘onistonga hujumni kuchaytirish orqali kelgandi. “Tolibon” hokimiyatga kelganidan keyin, Vashington Afg‘oniston hukumatining AQSHdagi hisoblarda saqlanib kelinayotgan zaxiralarini muzlatib qo‘ydi.
AQSH prezidenti Jo Bayden o‘tgan yil sentabrida yangi afg‘on hukumatini tan olish istiqbolini uzoq deb baholagan edi, oktabrda esa toliblar ularni tan olish uchun qo‘yilgan xalqaro hamjamiyat talablarini bajarganini ma’lum qildi.
Avvalroq Xitoy Xalq Respublikasi Tashqi ishlar vazirligi rasmiy vakili Chjao Litszyan AQSH iloji boricha tezroq Afg‘onistonga uning milliy aktivlarini qaytarib berishi kerakligini ma’lum qilgandi.
2021-yil 14-aprelda AQSHning amaldagi prezidenti Jo Bayden Afg‘onistondagi harbiy amaliyotini to‘xtatish qarorini e’lon qildi, bu Amerika tarixidagi eng uzoq xorijiy harbiy kampaniyaga aylangan edi. Amerika qo‘shinlarini olib chiqish 2021-yilning may oyida boshlangan va 31-avgustda yakunlangan.
Yanvar oyida BMT Bosh kotibi Antoniu Guterrish Afg‘onistonning davlat moliyaviy aktivlarini blokdan chiqarish va mamlakat uchun gumanitar operatsiyalarni moliyalashtirishni ko‘paytirishga chaqirgandi. Biroq mart oyi oxirida Afg‘oniston aktivlarini blokdan chiqarish ehtimoli bilan bog‘liq vaziyat “Tolibon”ning o‘rta maktab o‘quvchi qizlarini maktabga qo‘ymaslik haqidagi qarori bilan yomonlashdi. Xususan, shu sababdan AQSH rasmiylari toliblar bilan rejalashtirilgan maslahatlashuvlardan bosh tortdi.
Izoh (0)