Tokio Rossiyani Kuril orollarining janubiy qismida harbiy mashg‘ulotlar o‘tkazmaslikka chaqirdi

Yaponiya hukumati Rossiya bo‘lajak “Vostok-2022” harbiy mashg‘ulotlari zonasidan Kuril orollarining janubiy qismini chiqarib tashlashi zarur, deb hisoblamoqda. Bu haqda G‘arb OAVlari Yaponiya vazirlar mahkamasi bosh kotibi o‘rinbosari Yosixiko Isodzaki ma’lumotlariga asoslanib xabar berdi.

Yaponiya rasmiysining ta’kidlashicha, Tokio ushbu orollar hududida mashg‘ulotlar o‘tkazilishi ehtimolini qabul qila olmaydi va diplomatik kanallar orqali Moskvaga norozilik bildiradi.

U, shuningdek, Rossiya harbiylarining Yaponiya atrofida faolligi oshganidan xavotir bildirdi.

Eslatib o‘tamiz, Rossiya Mudofaa vazirligi “Vostok-2022” harbiy strategik mashg‘ulotlar 30-avgustdan 5-sentabrgacha o‘tkazilishini ma’lum qilgandi. Mashg‘ulot vazifalari Sharqiy harbiy okrug poligonlarida ishlab chiqilmoqda.

Yaponiya 1855-yildagi Savdo va chegaralar to‘g‘risidagi risolaga asoslanib, Kuril tizimining to‘rtta janubiy orollari — Iturup, Kunashir, Shikotan va Xabomayga da’vogarlik qilib keladi. Moskvaning pozitsiyasi shundan iboratki, Janubiy Kuril orollari Ikkinchi jahon urushidan keyin SSSR tarkibiga kirgan va Rossiyaning ular ustidan suvereniteti xalqaro huquqiy asosga ega.