АҚШ Давлат департаменти ва Молия вазирлиги вакиллари Афғонистонда бир йилдан буён ҳокимият тепасида турган «Толибон» ташкилоти вакиллари билан афғон ҳудудида гуманитар масалаларни ҳал қилиш масаласида учрашув ўтказди, деб ёзади «РБК».
Учрашув 27 июль куни Тошкентда, Афғонистон бўйича халқаро конференция доирасида бўлиб ўтди. АҚШ томонидан у ерда ушбу мамлакат бўйича махсус вакил Томас Уэст ҳамда молия вазирининг терроризмга қарши кураш ва молиявий разведка бўйича ўринбосари Брайан Нельсон, толиблар томонидан эса ҳаракатнинг юқори мансабли вакиллари қатнашди.
«АҚШ Афғонистондаги шошилинч гуманитар вазиятни ҳал қилиш зарурлигини маълум қилди. Иккала томон ҳам Афғонистон Марказий банкининг 3,5 миллиард долларлик лицензияланган захиралари афғон халқи манфаатлари йўлида ишлатилишига йўналтирилган жорий саъй-ҳаракатларни муҳокама қилди», — дейилади Давлат департаменти хабарида.
Афғонистоннинг Khaama Press агентлиги «Толибон»нинг Ташқи ишлар вазирлиги вакилига таяниб ёзишича, Вашингтон билан учрашувда «Афғонистоннинг музлатилган активлари, иқтисодий барқарорлик, гуманитар ёрдам ва бошқа айрим иқтисодий масалалар» муҳокама қилинган. Толиблар делегацияси Афғонистоннинг музлатиб қўйилган пуллари берилишини талаб қилган.
«Толибон» Афғонистонда ҳокимият тепасига 2021 йил августида, 2011 йилдан буён мамлакат ҳудудида бўлиб турган Америка ҳарбий контингенти кетганидан кейин, Афғонистонга ҳужумни кучайтириш орқали келганди. «Толибон» ҳокимиятга келганидан кейин, Вашингтон Афғонистон ҳукуматининг АҚШдаги ҳисобларда сақланиб келинаётган захираларини музлатиб қўйди.
АҚШ президенти Жо Байден ўтган йил сентябрида янги афғон ҳукуматини тан олиш истиқболини узоқ деб баҳолаган эди, октябрда эса толиблар уларни тан олиш учун қўйилган халқаро ҳамжамият талабларини бажарганини маълум қилди.
Аввалроқ Хитой Халқ Республикаси Ташқи ишлар вазирлиги расмий вакили Чжао Лицзянь АҚШ иложи борича тезроқ Афғонистонга унинг миллий активларини қайтариб бериши кераклигини маълум қилганди.
2021 йил 14 апрелда АҚШнинг амалдаги президенти Жо Байден Афғонистондаги ҳарбий амалиётини тўхтатиш қарорини эълон қилди, бу Америка тарихидаги энг узоқ хорижий ҳарбий кампанияга айланган эди. Америка қўшинларини олиб чиқиш 2021 йилнинг май ойида бошланган ва 31 августда якунланган.
Январь ойида БМТ Бош котиби Антониу Гутерриш Афғонистоннинг давлат молиявий активларини блокдан чиқариш ва мамлакат учун гуманитар операцияларни молиялаштиришни кўпайтиришга чақирганди. Бироқ март ойи охирида Афғонистон активларини блокдан чиқариш эҳтимоли билан боғлиқ вазият «Толибон»нинг ўрта мактаб ўқувчи қизларини мактабга қўймаслик ҳақидаги қарори билан ёмонлашди. Хусусан, шу сабабдан АҚШ расмийлари толиблар билан режалаштирилган маслаҳатлашувлардан бош тортди.
Изоҳ (0)