Xitoyning Uxan shahri hukumati to‘rt kishida koronavirus aniqlanganidan keyin shaharning qariyb 1 million aholi yashaydigan butun bir tumanini karantinga yopdi, deb yozadi Meduza.
Aholini muntazam testdan o‘tkazish doirasida ikki bemor aniqlangan bo‘lsa, yana ikki kishi ularning yaqin ijtimoiy aloqalari qatorida bo‘lib chiqdi. Kasallik hammada yengil shaklda, simptomlarsiz kechmoqda.
Karantin 27-iyuldan boshlab uch kunga kiritildi. Tumandagi barcha umumiy ovqatlanish korxonalari, diniy muassasalar, kinoteatrlar, bozorlar yopildi, jamoat transporti harakati to‘xtatildi.
Kasallik yuqtirish ehtimoli “yuqori” deb baholangan to‘rtta dahada esa umuman uydan chiqish taqiqlandi. Tumanning qolgan aholisidan esa hayotiy ahamiyatga ega zarurat bo‘lmasa, uyni tark etmaslik so‘ralmoqda.
Uxan 2019-yil oxirida koronavirus aniqlangan dunyodagi ilk shaharga aylangandi. 2020-yil bahorida butun shahar ikki oyga lokdaunga yopildi, bu kasallik tarqalishi darajasini tezkorlik bilan nolgacha tushirish imkonini berdi — Yevropada koronavirusning birinchi to‘lqini endi boshlangan paytda shahar normal hayot tarziga qaytib bo‘lgandi.
Dunyodagi aksariyat mamlakatlardan farqli o‘laroq, Xitoyda haligacha koronavirusga nisbatan “nol bardoshlilik” siyosati olib borilmoqda — uni keksa odamlar orasida vaksinatsiya darajasi pastligi bilan izohlashmoqda. Mamlakatga chet elliklar kirishi hamon qat’iy cheklangan.
Avvalroq Xitoyning Uxan universitetida vabo (xolera) bilan kasallanish bo‘yicha bitta holat aniqlangan edi, bemor kasalxonaga yotqizilgach, uning ahvoli barqarorlashgan, infeksiya simptomlari o‘tib ketgan.
Izoh (0)