Samarqand viloyatining Past Darg‘om tumani hokimligi murojaatchi ayol muammosini o‘rgangan blogerni spektakl tayyorlashda aybladi. Viloyat IIB esa blogerga nisbatan tergov harakatlari boshlanganini ma’lum qildi.
Ma’lum bo‘lishicha, samarqandlik bloger Jamshid Ismatov ijtimoiy tarmoqda past darg‘omlik ayol Navbahor Ulug‘murodovaning molxonada yashab kelayotgani tasvirlangan video tarqatgan. Videomaterialda ayolning turmush o‘rtog‘i vafot etgani, yashashga boshpanasi yo‘qligi sabab bugungi kunda ukasiga tegishli molxonada yashayotganligi hikoya qilingan.
“Navbahor turmush o‘rtog‘inikidan qaytib kelganidan so‘ng ota uyida ota-onasi ukasi va kelini bilan birga yashaydi. U ukasi onasi va turmush o‘rtog‘i bilan savdo qiladi. Qizig‘i, molxonadagi tasvirlar aynan uyda hech kim yo‘q payti, xonadon egalaridan so‘roqsiz, ular savdoda bo‘lgan paytda tasvirga olingan. O‘sha payt esa uyda ukasi Qobilning oq bilan qoraning farqiga bormaydigan o‘g‘li bo‘lgan, xolos. Navbahor yaqinlarining aytishicha tasvirga olib bo‘lingach, ayolni uning yaqinlaridan so‘ramay uyidan olib chiqib ketgan. Shu o‘rinda savol tug‘iladi. Deylik, Navbahor og‘ilxonada yashayotgan ekan blogerlar nima uchun onasi, ukasi yoki qo‘ni-qo‘shnilarning birortasidan holatga izoh so‘ramadi. Aksincha hech bir yaqinlari ishtiroksiz tasvirga olishni tashkillashtirdi?”, — deyiladi hokimlik munosabatida.
Lavhada ta’kidlanishicha, Navbahor molxonada yashamagan. Eri vafotidan so‘ng mehrsizlikda ayblanayotgan ukasi Qobilga uch nafar farzandini tashlab, Rossiyaga ketgan va oradan yetti oy o‘tib, qaytib kelgan. Hamda ukasining xonadonida yashagan.
Hokimlik axborot xizmati mas’ullari tomonidan tayyorlangan videolavhada “Navbahorni adashibdi dersiz, nima uchun Jamshid Ismatov birovning shaxsiyati bilan o‘ynashdi. Uning birgina noto‘g‘ri ma’lumot tarqatishi ortidan bugun butun bir oila nomiga dog‘ tushib, el oldida sharmanda bo‘lishiga sabab bo‘ldi-ku”, deyiladi. Ammo hokimlik ham videolavhasida na murojaatchi ayolning va na blogerning fikrini beradi.
Mazkur savolga javob bergan Past Darg‘om tumani hokimligi axborot xizmati rahbari Olim Sonniboyev avvaliga murojaatchi ayol videoda izoh berishni istamaganini aytgan bo‘lsa, keyinchalik murojaatchi ayol bilan umuman ko‘rishmaganini tan oldi.
“Murojaatchi ayoldan nega bunday yolg‘on axborot tarqatilayotgani haqida so‘raganimizda, u videoda bunga izoh berishni istamasligini aytdi. Blogerga esa nega bunaqa yolg‘on axborot tarqatdingiz, ayolning uyi bor ekan-ku, deb savolim berishim ahmoqlik bo‘lardi”, — deydi Olim Sonniboyev “Daryo” bilan muloqotda.
Samarqandlik bloger Jamshid Ismatov esa murojaatchi ayol uchun homiylar ko‘magida uy qurib bitkazganini, tez orada ayolga topshirilishini aytib, “men bor voqeani olib chiqdim”, deydi.
Blogerning qo‘shimcha qilishicha, murojaatchi ayolning marhum turmush o‘rtog‘idan qolgan uyda yashash niyati yo‘q.
“Ayolga uydan chiqib ketish talabi qo‘yilgan. Va hatto po‘pisa qilishib, uydan chiqib ketmasa majburlab, unga tuhmat qilib bo‘lsa-da, uydan haydashlarini aytishgan. Shuning uchun bechora ayol xalqdan yordam so‘radi. Hash-pash deguncha uy ham bitdi”, — deydi Jamshid Ismatov.
“Daryo” muxbiri blogerning gaplari qanchalik to‘g‘ri ekaniga aniqlik kiritish maqsadida murojaatchi ayol bilan bog‘lanish mumkin bo‘lgan telefon raqamlarni izladi.
Bunga javoban bloger murojaatchi ayol bilan bog‘lanish mumkin bo‘lgan raqamlarni berolmasligini aytib, “Hozir men murojaatchi ayolning yoniga borib, telefonim orqali Siz bilan gaplashtiraman va barcha gapni o‘zidan so‘raysiz”, dedi. Biroq keyinchalik telefon qo‘ng‘iroqlariga javob bermadi.
“Daryo” voqealar rivojini kuzatishda davom etadi.
Izoh (0)