Toshkentda avgust oyida SHHTga a’zo davlatlar Hududlari rahbarlari forumi bo‘lib o‘tadi

Toshkent shahrida 3—4 avgust kunlari O‘zbekiston Respublikasining Shanxay hamkorlik tashkilotiga raisligi doirasida Hududlar rahbarlari forumi bo‘lib o‘tadi. Bu haqda Tashqi ishlar vazirligi xabar qildi.

Qayd etilishicha, forumning asosiy maqsadi SHHTga a’zo davlatlar e’tiborini turizm, madaniyat va qishloq xo‘jaligini rivojlantirish masalalariga jalb etishdan iborat hisoblanadi. Ikki kunlik tadbir dasturi yalpi majlis va uchta panel munozaralari, shuningdek, Tashkilotga a’zo mamlakatlar ishbilarmon doiralari vakillari ishtirokida bo‘lib o‘tadigan biznes-forumni o‘z ichiga oladi.

Panel munozaralarida ishtirokchilar tomonidan qishloq xo‘jaligi mahsulotlarini ishlab chiqarish va qayta ishlash bo‘yicha qo‘shma yuqori texnologik loyihalar, qishloq xo‘jaligi sohasida, shu jumladan, oziq-ovqat mahsulotlari ishlab chiqarishda innovatsion texnologiyalarni joriy etish, shuningdek, turizm va transport logistikasi sohasidagi hamkorlikka e’tibor qaratiladi.

Hududlar rahbarlari forumi SHHTga a’zo mamlakatlarga mintaqani rivojlantirishning istiqbolli yo‘nalishlarini har tomonlama ko‘rib chiqish imkonini beradigan muloqot platformasi vazifasini bajaradi.