Самарқанд вилоятининг Паст Дарғом тумани ҳокимлиги мурожаатчи аёл муаммосини ўрганган блогерни спектакль тайёрлашда айблади. Вилоят ИИБ эса блогерга нисбатан тергов ҳаракатлари бошланганини маълум қилди.
Маълум бўлишича, самарқандлик блогер Жамшид Исматов ижтимоий тармоқда паст дарғомлик аёл Навбаҳор Улуғмуродованинг молхонада яшаб келаётгани тасвирланган видео тарқатган. Видеоматериалда аёлнинг турмуш ўртоғи вафот этгани, яшашга бошпанаси йўқлиги сабаб бугунги кунда укасига тегишли молхонада яшаётганлиги ҳикоя қилинган.
«Навбаҳор турмуш ўртоғиникидан қайтиб келганидан сўнг ота уйида ота-онаси укаси ва келини билан бирга яшайди. У укаси онаси ва турмуш ўртоғи билан савдо қилади. Қизиғи, молхонадаги тасвирлар айнан уйда ҳеч ким йўқ пайти, хонадон эгаларидан сўроқсиз, улар савдода бўлган пайтда тасвирга олинган. Ўша пайт эса уйда укаси Қобилнинг оқ билан қоранинг фарқига бормайдиган ўғли бўлган, холос. Навбаҳор яқинларининг айтишича тасвирга олиб бўлингач, аёлни унинг яқинларидан сўрамай уйидан олиб чиқиб кетган. Шу ўринда савол туғилади. Дейлик, Навбаҳор оғилхонада яшаётган экан блогерлар нима учун онаси, укаси ёки қўни-қўшниларнинг бирортасидан ҳолатга изоҳ сўрамади. Аксинча ҳеч бир яқинлари иштироксиз тасвирга олишни ташкиллаштирди?», — дейилади ҳокимлик муносабатида.
Лавҳада таъкидланишича, Навбаҳор молхонада яшамаган. Эри вафотидан сўнг меҳрсизликда айбланаётган укаси Қобилга уч нафар фарзандини ташлаб, Россияга кетган ва орадан етти ой ўтиб, қайтиб келган. Ҳамда укасининг хонадонида яшаган.
Ҳокимлик ахборот хизмати масъуллари томонидан тайёрланган видеолавҳада «Навбаҳорни адашибди дерсиз, нима учун Жамшид Исматов бировнинг шахсияти билан ўйнашди. Унинг биргина нотўғри маълумот тарқатиши ортидан бугун бутун бир оила номига доғ тушиб, эл олдида шарманда бўлишига сабаб бўлди-ку», дейилади. Аммо ҳокимлик ҳам видеолавҳасида на мурожаатчи аёлнинг ва на блогернинг фикрини беради.
Мазкур саволга жавоб берган Паст Дарғом тумани ҳокимлиги ахборот хизмати раҳбари Олим Соннибоев аввалига мурожаатчи аёл видеода изоҳ беришни истамаганини айтган бўлса, кейинчалик мурожаатчи аёл билан умуман кўришмаганини тан олди.
«Мурожаатчи аёлдан нега бундай ёлғон ахборот тарқатилаётгани ҳақида сўраганимизда, у видеода бунга изоҳ беришни истамаслигини айтди. Блогерга эса нега бунақа ёлғон ахборот тарқатдингиз, аёлнинг уйи бор экан-ку, деб саволим беришим аҳмоқлик бўларди», — дейди Олим Соннибоев «Дарё» билан мулоқотда.
Самарқандлик блогер Жамшид Исматов эса мурожаатчи аёл учун ҳомийлар кўмагида уй қуриб битказганини, тез орада аёлга топширилишини айтиб, «мен бор воқеани олиб чиқдим», дейди.
Блогернинг қўшимча қилишича, мурожаатчи аёлнинг марҳум турмуш ўртоғидан қолган уйда яшаш нияти йўқ.
«Аёлга уйдан чиқиб кетиш талаби қўйилган. Ва ҳатто пўписа қилишиб, уйдан чиқиб кетмаса мажбурлаб, унга туҳмат қилиб бўлса-да, уйдан ҳайдашларини айтишган. Шунинг учун бечора аёл халқдан ёрдам сўради. Ҳаш-паш дегунча уй ҳам битди», — дейди Жамшид Исматов.
«Дарё» мухбири блогернинг гаплари қанчалик тўғри эканига аниқлик киритиш мақсадида мурожаатчи аёл билан боғланиш мумкин бўлган телефон рақамларни излади.
Бунга жавобан блогер мурожаатчи аёл билан боғланиш мумкин бўлган рақамларни беролмаслигини айтиб, «Ҳозир мен мурожаатчи аёлнинг ёнига бориб, телефоним орқали Сиз билан гаплаштираман ва барча гапни ўзидан сўрайсиз», деди. Бироқ кейинчалик телефон қўнғироқларига жавоб бермади.
«Дарё» воқеалар ривожини кузатишда давом этади.
Изоҳ (0)