Jizzax shahrida tabiiy gazdan noqonuniy foydalanish holati aniqlandi. Bu haqda Iqtisodiy jinoyatlarga qarshi kurashish departamenti xabar berdi.
Ta’kidlanishicha, Bosh prokuratura huzuridagi departamentning Paxtakor tumani bo‘limi tomonidan tergovga qadar tekshiruv o‘tkazilgan. Unda “J.T.” MCHJga qarashli Jizzax shahrida joylashgan g‘isht ishlab chiqarish sexi 471,6 million so‘m qarzdorligi sababli tabiiy gaz tarmog‘idan uzilgan bo‘lsa-da, korxonaning mas’ul shaxslari aholi uchun o‘tkazilgan o‘rta bosimli tabiiy gaz tarmog‘iga noqonuniy ulangani aniqlandi.
Shuningdek, qo‘lbola usulda tayyorlangan gorelkalardan foydalanib kelgani oqibatida davlat va jamiyat manfaatlariga 272,3 million so‘m zarar yetkazilgani ma’lum bo‘ldi.
Mazkur holat yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)