O‘zbekiston mobil internet narxining arzonligi bo‘yicha 223 ta davlat ichida 15-o‘rinni egalladi. Bu haqda Cable xabar bermoqda.
O‘tgan yilda mamlakat 1 Gb uchun o‘rtacha 0,6 dollar narx bilan 22-o‘rinni egallagandi.
Ma’lumotlarga ko‘ra, O‘zbekistonda mobil internetning o‘rtacha narxi yil davomida deyarli 40 foizga pasaygan.
Mamlakatda 1 Gb internet narxi o‘rtacha 0,37 dollar bo‘lib, MDH mamlakatlari orasida internet arzonligi bo‘yicha 2-o‘rinni egallaydi.
Markaziy Osiyo va MDHdagi eng arzon narx Qirg‘izistonda — 1 Gb uchun 0,17 dollar. Mamlakat o‘tgan yilgi darajasidan to‘rt pog‘onaga tushib, 6-o‘rinni egalladi.
Qozog‘iston esa kichik farq bilan (0,3726 dollar) O‘zbekistondan bir o‘rin pastda.
Tojikistonda 1 Gb internet narxi o‘rtacha 1,94 dollar bo‘lib, u jahonda 131-o‘rinda turadi.
Markaziy Osiyoda eng qimmat internet esa Turkmanistonda — 1 Gb uchun 14,27 dollar. Mamlakat dunyo bo‘yicha 227-o‘rinni egallagan.
Mobil internet narxlari rivojlangan infratuzilma va yuqori talab bilan bog‘liq. Ro‘yxatning o‘rtasida joylashgan ko‘plab mamlakatlar yaxshi infratuzilma va raqobatbardosh uyali aloqa bozorlariga ega va ularning narxlari dunyodagi eng arzonlari qatoriga kirmasa ham, iste’molchilar tomonidan qimmat deb hisoblanmaydi, — deydi tahlilda Dan Hovdle.
Eng arzon mobil internet Isroilda — 1 Gb uchun 0,04 dollar. Keyingi o‘rinlarda Italiya (0,12 dollar), San-Marino (0,12 dollar), Fiji (0,15 dollar) va Hindiston (0,17 dollar) joy olgan.
Eng qimmat mobil internet esa Sent-Yelena orollari (41,06 dollar), Folklend orollari (38,45 dollar), San-Tome va Prinsipi Respublikasi (29,49 dollar)ga tegishli.
Avvalroq axborot-kommunikatsiya texnologiyalari O‘zbekistonda aholi daromadini qanchaga oshirishi haqida xabar berilgandi.
Izoh (0)