O‘zbekistonda va boshqa davlatlarda o‘rtacha oylikka qancha benzin sotib olish mumkin?

Butun dunyoda benzin narxi rekord darajada oshib bormoqda. “Daryo” mamlakatlarda o‘rtacha oylikka qancha benzin sotib olish mumkinligini aniqladi.

Hisob-kitoblar davlatlarning statistika idoralari tomonidan qayd etilgan maoshlarga ko‘ra amalga oshirildi. Qulaylik uchun summalar AQSH dollarida ko‘rsatilgan.

O‘zbekistonda o‘rtacha oylik ish haqi 275 dollar, 1 litr benzinning narxi esa 0,95 dollar. Ushbu oylikka 290 litr benzin sotib olish mumkin.

Qirg‘izistonda o‘rtacha oylik ish haqi 221 dollar bo‘lib, 1 litr benzin narxi 0,83 dollar. Mamlakat aholisi o‘rtacha oylik ish haqiga 267 litr benzin xarid qilishi mumkin.

Qozog‘istonda o‘rtacha oylik ish haqi 520 dollar, 1 litr benzin esa 0,47 dollar. Aholi ushbu oylikka 1 102 litr benzin sotib ola oladi.

Turkiyada o‘rtacha oylik ish haqi 320 dollar, 1 litr benzin 1,61 dollar. Ushbu maoshga aholi 199 litr benzin olishi mumkin.

Rossiyada o‘rtacha oylik ish haqi 903 dollar, 1 litr benzin narxi 0,89 dollar. Bu narxga 1 011 litr benzin sotib olish mumkin.

AQSHda o‘rtacha oylik ish haqi 4 018 dollar, 1 litr benzinning narxi 1,36 dollar. Mamlakat aholisi o‘rtacha oylik ish haqiga 2 952 litr benzin xarid qilishi mumkin.

2022-yil iyun oyida eng arzon benzin Jazoir (0,31 dollar), Quvayt (0,34 dollar) va Eronda (0,35 dollar) qayd etilgan. Gonkong esa eng yuqori narx — 1 litr benzin uchun 3 dollar.

Benzin narxining o‘rtacha ish haqiga nisbati bo‘yicha jahon reytingida Fors ko‘rfazi mamlakatlari yetakchi o‘rinlarni egallashda davom etmoqda: Qatar (5 968 litr), Quvayt (5 578 litr) va Saudiya Arabistoni (4 372 litr).

Reytingda oxirgi o‘rinni Kuba egallab turibdi, u yerda o‘rtacha ish haqiga atigi 27 litr benzin olish mumkin.

Avvalroq metan gaz narxlari ko‘tarilganicha yo‘q, biroq sezilarli tafovutlar borligi haqida xabar berilgandi.