Farg‘ona viloyati O‘zbekiston tumanida istiqomat qiladigan bog‘bon va poliz mahsulotlarini yetishtiruvchi Yusufjon Ergashev tarvuzni noodatiy usulda — tik holda mini fermada yetishtirdi. Bu haqda “Xalq so‘zi online” nashridan ma’lum bo‘ldi.
Uning so‘zlariga ko‘ra, ushbu tajriba natijalarini tarvuz yetishtirish uchun kichik maydonlardan samarali foydalanish nuqtayi nazaridan muvaffaqiyatli deb hisoblash mumkin.
Yusufjon Ergashev tumanda meva-sabzavot yetishtirishda o‘ziga xos innovatsion yondashuvlari bilan tanilgan.
U oila a’zolari bilan birgalikda o‘zining kichik tomorqasidan foydalanib, doimiy ravishda turli nou-xaularni qo‘llash yoki yurtdoshlarini biror yangilik bilan ajablantirishga intiladi.
Fermerning navbatdagi tajribasi tarvuzni vertikal usulda kichik maydonlarda yetishtirish ekani aytilgan.
Bu usul yordamida 20 sotix maydonni egallaydigan ko‘chatlar atigi 2 sotix yerda parvarishlandi. Dastlabki yilning o‘zida o‘rtacha 10 tonna hosil va 30-35 million so‘m daromad olishni ko‘zlayapmiz, — deydi mirishkor.
Yusufjon Ergashevning so‘zlariga ko‘ra, tarvuz yetishtirishning bunday usuli yer resurslaridan foydalanishda 10 barobar tejamkorlikka erishishni ta’minlaydi, 1 gektar yerdan olinadigan hosil esa 5 tonnani tashkil etadi.
Buning uchun bor-yo‘g‘i 1,5 million so‘m xarajat qilindi. Aytgancha, oila a’zolari tajribali agronomlar bilan hamkorlikda ko‘chatni mahalliy biogumus yordamida oziqlantirdi. Hosil pishguncha qadar ikki marta mineral o‘g‘itdan foydalanildi.
Mirishkor oila a’zolari bilan kelgusi yili yanada ertaroq va ko‘proq maydonda vertikal usulda tarvuz yetishtirish hamda ushbu tajribani ommalashtirishni rejalashtirmoqda.
Izoh (0)