Ўзбекистон мобил интернет арзонлиги бўйича дунёда 15-ўринга чиқди. Қўшни давлатларда нархлар қандай?

Ўзбекистон мобил интернет нархининг арзонлиги бўйича 223 та давлат ичида 15-ўринни эгаллади. Бу ҳақда Cable хабар бермоқда.

Ўтган йилда мамлакат 1 Гб учун ўртача 0,6 доллар нарх билан 22-ўринни эгаллаганди.

Маълумотларга кўра, Ўзбекистонда мобил интернетнинг ўртача нархи йил давомида деярли 40 фоизга пасайган.

Мамлакатда 1 Гб интернет нархи ўртача 0,37 доллар бўлиб, МДҲ мамлакатлари орасида интернет арзонлиги бўйича 2-ўринни эгаллайди.

Марказий Осиё ва МДҲдаги энг арзон нарх Қирғизистонда — 1 Гб учун 0,17 доллар. Мамлакат ўтган йилги даражасидан тўрт поғонага тушиб, 6-ўринни эгаллади.

Қозоғистон эса кичик фарқ билан (0,3726 доллар) Ўзбекистондан бир ўрин пастда.

Тожикистонда 1 Гб интернет нархи ўртача 1,94 доллар бўлиб, у жаҳонда 131-ўринда туради.

Марказий Осиёда энг қиммат интернет эса Туркманистонда — 1 Гб учун 14,27 доллар. Мамлакат дунё бўйича 227-ўринни эгаллаган.

Мобил интернет нархлари ривожланган инфратузилма ва юқори талаб билан боғлиқ. Рўйхатнинг ўртасида жойлашган кўплаб мамлакатлар яхши инфратузилма ва рақобатбардош уяли алоқа бозорларига эга ва уларнинг нархлари дунёдаги энг арзонлари қаторига кирмаса ҳам, истеъмолчилар томонидан қиммат деб ҳисобланмайди, — дейди таҳлилда Дан Ҳовдле.

Энг арзон мобил интернет Исроилда — 1 Гб учун 0,04 доллар. Кейинги ўринларда Италия (0,12 доллар), Сан-Марино (0,12 доллар), Фижи (0,15 доллар) ва Ҳиндистон (0,17 доллар) жой олган.

Энг қиммат мобил интернет эса Сент-Елена ороллари (41,06 доллар), Фолкленд ороллари (38,45 доллар), Сан-Томе ва Принципи Республикаси (29,49 доллар)га тегишли.

Аввалроқ ахборот-коммуникация технологиялари Ўзбекистонда аҳоли даромадини қанчага ошириши ҳақида хабар берилганди.