Rossiya prezidenti Vladimir Putin kasal ekani haqidagi xabarlarga izoh berar ekan, AQSH Markaziy razvedka boshqarmasi direktori Uilyam Berns u “soppa-sog‘”ligini aytdi. Bu haqda Berns Aspen forumidagi tadbirda gapirdi.
“Prezident Putinning sog‘lig‘i haqida ko‘p mish-mishlar yuribdi. Ammo shuni aytishimiz mumkinki, u soppa-sog‘. Bu razvedkaning norasmiy bahosi”, — dedi Berns.
Avvalroq Tehronda bo‘lib o‘tgan “Yangi zamon uchun kuchli g‘oyalar” forumidagi nutqi davomida Putinni bir necha bor yo‘tal tutgan. Keyinchalik u buni konditsionerlarning ishi bilan izohlagan.
Berns, shuningdek, Putinning sochlaridagi ko‘plab oqlar Rossiya va Eron bilan olib borilgan muzokaralardan “qolganini” ta’kidladi. U Rossiya prezidentining Eronga tashrifi chog‘ida mamlakat oliy rahbari Ali Xomanaiy bilan tushgan suratlariga qarab shunday fikr bildirdi.
Vladimir Putinning xastaligi ehtimoli haqidagi mish-mishlar so‘nggi oylarda tarqaldi. Aprelda “Proyekt” nashri Putinga safarlarda shifokorlar guruhi, shu jumladan, onkologik kasalliklar va qalqonsimon bez muammolari bo‘yicha mutaxassislar hamrohlik qilayotgani haqida yozdi. 2022-yil mayida Putin saratonni boshidan o‘tkazgani haqida Rossiya prezidenti bilan shaxsan ishlagan rejissor Oliver Stoun aytib o‘tgan edi.
Iyunda Newsweek AQSH razvedkasiga tayanib, Putin aprelda yuqori bosqichdagi onkologik kasallikdan davolangani haqida xabar bergandi.
Rossiya tashqi ishlar vaziri Sergey Lavrov may oxirida “aqli raso odamlar” Putinda hech qanday kasallik belgilarini ko‘rmasligini aytgandi.
Izoh (0)