Россия президенти Владимир Путин касал экани ҳақидаги хабарларга изоҳ берар экан, АҚШ Марказий разведка бошқармаси директори Уильям Бернс у «соппа-соғ»лигини айтди. Бу ҳақда Бернс Аспен форумидаги тадбирда гапирди.
«Президент Путиннинг соғлиғи ҳақида кўп миш-мишлар юрибди. Аммо шуни айтишимиз мумкинки, у соппа-соғ. Бу разведканинг норасмий баҳоси», — деди Бернс.
Аввалроқ Теҳронда бўлиб ўтган «Янги замон учун кучли ғоялар» форумидаги нутқи давомида Путинни бир неча бор йўтал тутган. Кейинчалик у буни кондиционерларнинг иши билан изоҳлаган.
Бернс, шунингдек, Путиннинг сочларидаги кўплаб оқлар Россия ва Эрон билан олиб борилган музокаралардан «қолганини» таъкидлади. У Россия президентининг Эронга ташрифи чоғида мамлакат олий раҳбари Али Хоманаий билан тушган суратларига қараб шундай фикр билдирди.
Владимир Путиннинг хасталиги эҳтимоли ҳақидаги миш-мишлар сўнгги ойларда тарқалди. Апрелда «Проект» нашри Путинга сафарларда шифокорлар гуруҳи, шу жумладан, онкологик касалликлар ва қалқонсимон без муаммолари бўйича мутахассислар ҳамроҳлик қилаётгани ҳақида ёзди. 2022 йил майида Путин саратонни бошидан ўтказгани ҳақида Россия президенти билан шахсан ишлаган режиссёр Оливер Стоун айтиб ўтган эди.
Июнда Newsweek АҚШ разведкасига таяниб, Путин апрелда юқори босқичдаги онкологик касалликдан даволангани ҳақида хабар берганди.
Россия ташқи ишлар вазири Сергей Лавров май охирида «ақли расо одамлар» Путинда ҳеч қандай касаллик белгиларини кўрмаслигини айтганди.
Изоҳ (0)