AQSH Ukrainadagi urushda Rossiyaning 15 ming harbiysi halok bo‘lgan, 45 mingga yaqin odami yaralangan bo‘lishi mumkin, deb hisoblamoqda. Bu haqda AQSH Markaziy razvedka boshqarmasi direktori Uilyam Berns Kolorado shtati Aspen shahrida bo‘lib o‘tgan Xavfsizlik forumidagi chiqishida aytib o‘tdi.
“AQSH razvedka hamjamiyatining so‘nggi hisob-kitoblariga ko‘ra, 15 000 ga yaqin Rossiya harbiysi halok bo‘lgan va bundan uch baravar ko‘pi yaralangan. Shunday qilib, yo‘qotishlar juda katta. Ukrainaliklar ham talafot ko‘rgan — biroz kamroq bo‘lishi mumkin, ammo bu ham katta yo‘qotish”, — deydi Berns.
Markaziy razvedka boshqarmasi direktori Vladimir Putinning salomatligi yomonlashayotgani haqidagi taxminlarga ham to‘xtalib o‘tdi. “Prezident Putinning sog‘lig‘i haqida ko‘p mish-mishlar yuribdi. Aytishimiz mumkinki, u soppa-sog‘”, — dedi Berns. Uning qo‘shimcha qilishicha, bu AQSH razvedkasining norasmiy bahosi.
Buyuk Britaniya Mudofaa vaziri Ben Uolles aprel oyi oxirida Ukrainada 15 ming rossiyalik harbiy halok bo‘lganini aytgandi. Britaniya harbiy razvedkasi esa may oyi oxirida Rossiyaning yo‘qotishlarini shunday baholagan.
Iyul oyi o‘rtalarida Britaniya Mudofaa shtabi boshlig‘i admiral Toni Radakin Ukrainadagi qariyb besh oylik janglarda 50 ming rossiyalik askarlar yo halok bo‘lgan yoki yaralanganini aytdi.
Ochiq ma’lumotlarga asoslanib, “Mediazona” va BBC 15-iyulga qadar Ukrainada 4760 rus askari halok bo‘lganini tasdiqladi.
Ukraina Qurolli kuchlari Bosh shtabi ma’lumotlariga ko‘ra, urush boshlanganidan 20-iyulgacha qariyb 39 ming rossiyalik harbiy halok bo‘lgan.
Rossiya Mudofaa vazirligi jangovar harakatlar davrida Rossiya armiyasining yo‘qotishlari haqida atigi ikki marta rasmiy xabar berdi. 2-mart kuni vazirlik 498 kishi halok bo‘lgani va 1597 kishi yaralangani, 25-mart kuni esa 1351 kishi halok bo‘lgani va 3825 kishi yaralangani haqida xabar bergan edi.
Izoh (0)