Portugaliyada ekstremal issiqlik to‘lqini tufayli 1000 dan ortiq odam vafot etdi, deb yozmoqda Reuters.
Qurg‘oqchilikdan aziyat chekayotgan Portugaliyada o‘tgan hafta havo harorati 40 darajadan oshib ketdi. So‘nggi bir necha kun ichida o‘limlar soni kamaygan bo‘lsa-da, mamlakat bosh sanitariya shifokori Grase Freytasning ta’kidlashicha, ularning ko‘rsatkichi yilning shu davri uchun normal darajadan yuqori.
Bundan tashqari, yuqori harorat va davom etayotgan qurg‘oqchilik sabab Portugaliya o‘rmon yong‘inlari ichida qolgan.
“Portugaliya sayyoramizning ekstremal issiqlikdan ko‘proq aziyat chekishi mumkin bo‘lgan mintaqalaridan biridir. Biz yuqori harorat davriga yanada tayyor turishimiz kerak”, — deya ogohlantirdi u.
Avval Portugaliyada 7-iyuldan 13-iyulgacha bo‘lgan issiqlik to‘lqini tufayli 238 kishi halok bo‘lgani haqida xabar berilgandi, biroq Freytasning so‘zlariga ko‘ra, 18-iyulgacha bo‘lgan davrda qurbonlar soni 1063 nafarga yetgan.
Lissabon universiteti fanlar fakulteti tadqiqotchisi Karlos Antunesning qayd etishicha, jazirama qurbonlari asosan qariyalardir.
“Iqlim o‘zgarishi bilan o‘limlar sonining ortishi kutilmoqda, shu sababli biz ta’sirni minimallashtirish uchun jamoaviy sog‘liqni saqlash darajasida choralar ko‘rishimiz kerak”, — dedi mutaxassis.
Izoh (0)