AQSH Raytheon Technologies harbiy sanoat kompaniyasining gipertovushli raketasi muvaffaqiyatli sinovdan o‘tkazilgani haqida ma’lum qildi, deb yozmoqda Reuters.
Ma’lum qilinishicha, parvoz davomida apparat tovush tezligidan besh baravar tez uchgan, bu esa 2013-yildan beri shu turdagi qurolning uchinchi muvaffaqiyatli sinovi bo‘ldi.
Qo‘shma Shtatlarda Gipertovushli havo qurollar konsepsiyasi (HAWC) dasturi Mudofaa ilg‘or tadqiqot loyihalari agentligi (DARPA) tomonidan boshqariladi. Bunday qurollarni ishlab chiqarish shartnomasi uchun Raytheon va Lockheed Martin Corp kompaniyalari kurash olib bormoqda.
Sentabr oyidan beri to‘rtta gipertovushli qurol sinovdan o‘tkazilgan. Raytheon mahsuloti sinovi ikki safar ham muvaffaqiyatli yakunlandi, Lockheed sinovi esa bir marta muvaffaqiyatli o‘tgan, bir marta muvaffaqiyatsizlikka uchragan.
Umuman olganda, Qo‘shma Shtatlar va uning global raqobatchilari gipertovushli qurollarning tezligi va manyovrligi ustida jadal ishlamoqda — chunki bu xususiyatlar ushbu qurollarni kuzatish va ushlab qolishni qiyinlashtiradi. Gipertovushli qurollar atmosferaning yuqori qatlamlarida tovush tezligidan besh baravar ko‘proq yoki soatiga 6200 kilometr tezlikda uchadi.
Avvalroq AQSH Air-Launched Rapid Response Weapon (ARRW) gipertovushli raketasi muvaffaqiyatli sinovdan o‘tkazilgani haqida xabar bergan edi.
Mavzuga doir: Hindiston yadro jangovar zaryadi bilan ucha oladigan Agni-IV raketasini sinovdan o‘tkazdi