Yevropa Ittifoqi davlatlarining doimiy vakillari Rossiyaga qarshi yangi, yettinchi sanksiyalar paketini ma’qulladi.
Litvaning Yevropa Ittifoqidagi doimiy vakili Arnoldas Prankevichusning so‘zlariga ko‘ra, navbatdagi cheklovlar qatoriga Rossiyadan oltin importini taqiqlash, mamlakatga eksport nazoratining yangi choralari, Sberbank aktivlarini muzlatish, 50 dan ortiq jismoniy va yuridik shaxslarga, jumladan siyosatchilar, harbiylar, biznesmenlar va targ‘ibotchilarga nisbatan sanksiyalar qo‘llash kiradi.
Avvalroq OAV yangi sanksiyalar ro‘yxatiga Moskva meri Sergey Sobyanin, Rossiya bosh vazirining birinchi o‘rinbosari Andrey Belousov, “Rostex” rahbari Sergey Chemezov, aktyorlar Sergey Bezrukov va Vladimir Mashkov, shuningdek, “Tungi bo‘rilar” baykerlar klubi a’zolari ham kiritilishi haqida yozgandi.
Shuningdek, G‘arb cheklovlari ostidagi Rossiya tovarlarini Litva orqali Kaliningrad viloyatiga yoki ocharchilik muammosiga duch kelish xavfi ostida bo‘lgan mamlakatlarga olib o‘tishda to‘siqlar bo‘lmasligi uchun Yevroittifoqning avvalgi chora-tadbirlariga tuzatishlar kiritilishi ma’lum qilindi. Tuzatishlar tibbiy va farmatsevtika mahsulotlarini yetkazib berishdagi muammolarni bartaraf etishi kerak. Ta’kidlanishicha, YI “qishloq xo‘jaligi mahsulotlari uchun to‘lovlarda uzilishlarga yo‘l qo‘ymaslik uchun” sanksiyalarga ba’zi istisnolar kiritishni rejalashtirmoqda
Yangi sanksiyalar Yevropa Ittifoqining rasmiy jurnalida chop etilganidan keyin 21-iyul kuni kuchga kiradi.
YIning avvalgi, oltinchi sanksiyalar paketi iyun oyi boshida taqdim etilgan edi. U Yevropa Ittifoqining Rossiya neftidan bosqichma-bosqich voz kechishini nazarda tutadi.
Izoh (0)