Dunyo bo‘ylab millionlab muxlislarning qalbidan joy olgan ayrim aktrisa va aktyorlarning ijodida ikki obrazni gavdalantirgan filmlar bor.
Nikolas Keyj “Adaptatsiya” kinofilmi
Gollivud aktyori Nikolas Keyjning “Adaptatsiya” filmidagi egizak aka-uka obrazi “Oskar” mukofoti sovrindorligi uchun mukammal nomzod bo‘ldi. Kinokartinada aktyor gavdalantirgan obrazlarning tashqi ko‘rinishi bir xil, biroq xulq-atvori bir-biridan tubdan farq qiladi. Rejissor Spayk Jons tomonidan ishlangan “Adaptatsiya” filmi 2002-yilda katta ekranlarga chiqqan.
Lyubov Orlova “Bahor” kinokartinasi
O‘tgan asrning eng mashhur kinoyulduzlaridan biri Lyubov Orlova “Bahor” filmida yosh aktrisa Vera Shatrova va olim Irina Nikitina rolini ijro etgan. Aktrisa gavdalantirgan obrazlar har tomonlama bir-biriga juda o‘xshash. Ushbu film Rossiyaning o‘sha davrdagi mashhur rejissorlardan biri Grigoriy Aleksandrov tomonidan suratga olingan bo‘lib, unda Georgiy Yumatov, Faina Ranevskaya, Nikolay Konovalov kabi rus aktyorlari ham ishtirok etgan.
Yevgeniy Leonov “Omadli jentlmenlar” filmi
Rossiyaning dunyoga mashhur aktyorlaridan biri Yevgeniy Leonov “Omadli jentlmenlar” filmida ikki xil obrazda namoyon bo‘lgan. Aktyor ijro etgan obrazlar xulq-atvor jihatidan bir-biriga qarama-qarshi hisoblanadi. Yevgeniy Leonov ushbu kinokartinada jinoyatchi va bolalar bog‘chasidagi tarbiyachi rollarini o‘ynagan. Film rejissor Aleksandr Seriy tomonidan suratga olingan va 1971-yilning oxirida kinoteatrlarda namoyish etilgan.
Charli Chaplin “Buyuk diktator” kinokartinasi
Charli Chaplin ijodining yuksak namunalaridan biri 1940-yilda AQSHda suratga olingan “Buyuk diktator” filmidir. Budjeti qariyb 2 million dollarni tashkil etgan film “Oskar” mukofotining bir nechta yo‘nalishlariga nomzodlik qilgan. Aktyor filmda kamtar yahudiy sartarosh va bu obrazga juda o‘xshab ketadigan, hokimiyatga chin dildan xizmat qiladigan diktator rolini ijro etgan.
Jessi Ayzenberg “Egizak” filmi
Rejissor Richard Ayoadi tomonidan 2014-yilda namoyish etilgan “Egizak” kinofilmida Jessi Ayzenberg ikkita obrazda namoyon bo‘ladi. Komediya janrida ishlangan filmda aktyorni bir-biriga tashqi ko’rinishi juda o‘xshab ketadigan obrazlarda ko‘rish mumkin. Ushbu filmda Gollivudning mashhur aktyorlaridan Richard Gir, Tofer Greys, Stiven Moyer ham ishtirok etgan.
Yuriy Yakovlev “Ivan Vasilyevich kasbini o‘zgartiradi” kinofilmi
Taniqli rus aktyori Yuriy Yakovlev “Ivan Vasilyevich kasbini o‘zgartiradi” filmida ikki xil obrazni ijro etgan. Ulardan biri ko‘p gapiradigan Bunsha va ikkinchisi Rossiya tarixida qat’iyatliligi bilan shuhrat qozongan shoh obrazi Ivan Grozniy bo‘lgan. Tashqi ko‘rinishida biroz farq qiladigan bu obrazlar aktyorga katta shuhrat keltirdi. Ushbu kinokartinada eng katta mablag‘ni Yuriy Yakovlev olgan. Mixail Bulgakov asari asosida suratga olingan filmga Leonid Gayday rejissorlik qilgan.
Marion Kotiyyar “Yaxshi mitti narsalar” kinokartinasi
“Taksi” kinofilmining yulduzlaridan biri aktrisa Marion Kotiyyar “Yaxshi mitti narsalar” kartinasida egizaklar rolini o‘ynagan. Ovozi uncha yaxshi bo‘lmasa ham kuylashdan charchamaydigan xonanda Lyusi va faqat pul topish ilinjida bo‘lgan Mari obrazlari Marion Kotiyyarga muvaffaqqiyat olib keldi. Rejissor Jil Pake-Brenner boshchilik qilgan ushbu film 2001-yilda katta ekranlarga chiqqan. Aktrisa filmdagi roli uchun “Sezar” mukofotiga nomzodlar qatoriga kiritilgan.
Jan Mare “Fantomas” kinofilmi
Mashhur fransuz aktyori Jan Mare “Fantomas” kinofilmining uchta qismida ham ikki xil obrazni gavdalantirgan. Trilogiyadagi birinchi film komissar Yuvening qo‘lga olinmaydigan jinoyatchi Fantomasni ta’qib qilishi va uning ko‘plab sarguzashtlari haqida. Andre Yubenel rejissorligidagi bu filmning birinchi qismi 1964-yilda katta ekranlarga chiqqan.
Jeyk Jillenxol “Dushman” filmi
Nobel sovrindori Xose Saramagoning romani asosida suratga olingan “Dushman” filmida Gollivud aktyori Jeyk Jillenxol professor Adam va aktyor Entoni obrazlarida namoyon bo‘lgan. Tashqi ko‘rinishi bir xil bo‘lgan obrazlarni bir-biridan kechinmalar, axloqiy jihatlari ajratib turadi. Film 2014-yilning fevral oyida premyera qilingan.
Mavzuga doir:
- 50 yoshdan keyin mashhur bo‘lgan va orzuga erishish uchun hech qachon kech emasligini isbotlagan yulduzlar (foto)
- Ssenariydan tashqari: suratga olish maydonchasida mushtlashib ketgan yulduzlar (foto)
- Yetimlikda o‘tgan bolaligiga qaramay muvaffaqiyat qozongan yulduzlar (foto)
- Van Damm, Bochelli, Vuychich va jismoniy nuqsoniga qaramay muvaffaqiyatga erishgan boshqa yulduzlar (foto)
Izoh (0)