O‘zbekiston xalq artisti, madaniyat vaziri Ozodbek Nazarbekov “Chotki TV” YouTube kanaliga bergan intervyusida Kanizaning ijodiga munosabati, Jasur Mavlonov va Sanjayning kelishmovchiligi, shu bilan birgalikda san’atkorlarga beriladigan litsenziyaning narxi tushirilgani, ushbu narx nimalarga qarab belgilanishi, ularga mukofot berishda qanchalik shaffoflikka amal qilinayotgani haqida gapirdi.
Sanjay va Jasur Mavlonovning kelishmovchiligi haqida
“Jasur Mavlonov Sanjay bilan kelishmay qolgan ekan, men eshitmagan edim, keyinroq yetkazishdi. Keyin Jasurni chaqirdim va nasihat qilib qattiqroq gapirdim. Bugungi yoshlarda mana shuning ortidan piar qilib e’tiborga tushish istagi bor. Hattoki bir-ikkita joydan eshitib qoldim, menga tushuntirib berishdiki, ikki taraf ham oldin telefonda urushib keyin shu joyda to‘xtab buni internetda qilamiz der ekan. O‘zi urushib turibdi, lekin shu yerda ham piar esidan chiqmas ekan. Bu ishlar yaxshi emas. Ha, desa shu bilan e’tirborda turish mumkin derkan. Undan ko‘ra mehnat qil, e’tiborda turish uchun, sen ijodkor bo‘lib maydonga kirib kelgansan. Sen faqat ijod bilan e’tiborda tur. Meni nazarimda kim piar qilib e’tiborga tushaman desa, o‘sha odam orqaga ketadi. Undan ko‘ra halol bahosini olib yashasin. Shundan keyin Jasurni qattiq koyidim, internetda ham ko‘rinmayapti”, — deydi xonanda.
San’atkorlarga mukofot berishda qanchalik shaffoflikka amal qilinmoqda?
“Madaniyat vazirligidagi ‘Madaniyat fidokori’ degan ko‘krak nishoniga vakolatimiz bor. Boshqa ordenlarga ham mutlaqo aloqamiz yo‘q deya olmayman, o‘zimizdan yuqori idoralarga hujjatlarni biz beramiz. Hammasini ortiqchasi bilan kiritamiz, u yerdagi mukofotlarni berish bo‘yicha komissiya bor, ular ijodkorlardan, xonandalardan, bastakorlardan, yozuvchi va shoirlardan tashkil topadi. Ushbu komissiya har yili boshqatdan tashkil qilinadi va ishlar yopiq tarzda ko‘rib chiqiladi”, — deydi madaniyat vaziri.
Kanizaning “xurmacha” qiliqlariga munosabati
“Ko‘pincha Kanizaning ‘xurmacha qiliqlari’ haqida menga yozishadi. Nima qilish mumkin buni, nima qilsa bo‘ladi? Katta, aqlini tanigan odam. Unga biron jazoni qo‘llash mumkindir, ertaga u menga chiqib aytishi mumkin, mana internetda shuncha odam yomon gapirib yozyapti, nimaga ularga jazo qo‘llamayapsan deb. Ana boshqalar mendan ham yomon ishni qilyapti, ularga ham jazo bormi deyishi mumkin. O‘zini hurmat qilmagan insonga men nima deyishni bilmayman. U o‘zini hurmat qilmayapti, butun xalq yomon gaplar gapirsa ham yana shu ishni qilyapti”, — deydi O‘zbekiston xalq artisti Ozodbek Nazarbekov.
San’atkorlarga beriladigan litsenziyaning narxi va ushbu narx nimalarga qarab belgilanishi haqida
“Litsenziya adashmasam 2001-yilda joriy etilgan. Bu nima uchun joriy qilingan? Eng avvalo, ijodkorlardan soliq undirish tizimi bo‘lmagani uchun ushbu mexanizm joriy qilingan. O‘sha paytda umumiy hisob-kitob qilinib bu san’atkor qancha topadi, boshqasi qancha, Toshkentdagilari, viloyatdagilari qancha topishi topishi o‘tirib muhokama qilingan. Bu tizim soliq undirish sifatida, san’atkorlarning daromadini ham, harajatini ham bilishning iloji yo‘q bo‘lgani uchun bir martalik oddiy to‘lov qilish belgilangan. Biroq oxirgi yillarda to‘y industriyasi izdan chiqqanining guvohi bo‘lyapmiz. Shu jarayonda e’tirozlar paydo bo‘la boshladi. Bundan 10 yil oldin litsenziyalarga hech qanday e’tiroz yo‘q edi, kim nima desa ham xo‘p deb litsenziyasini olib faoliyatini davom ettiraverardi. To‘y insdustriyasi ham joyida edi, bemalol harajatlarni qoplay olardi. Oxirgi yillarda litsenziyaning ahamiyati uncha qolmadi, chunki solishtirib ko‘rilganda daromadi uncha qoplanilmayotgan vaziyatlar yuzaga keldi.
Litsenziya haqida yangilikni aytadigan bo‘lsam yaqinda prezidentimiz litsenziya faoliyati bo‘yicha yangi farmonni imzoladi. Bu esa juda katta imtiyozlarni taqdim etdi. Imtiyozlar berilmasdan oldin litsenziya narxi birinchi reytingdagi san’atkorlar uchun yiliga 62 million so‘m edi, shu narx 9 millionga tushirildi. Bu narx o‘tgan yili 21 millionga tushirilgan edi. Litsenziya berishda birinchi va ikkinchi kategoriya birlashtirib yuborildi, bunda esa vakolat bir xil, to‘lovda farq bo‘lar edi.
Ularning reytingi unvoni, to‘ylarda qanaqa faoliyat yuritayotganiga qarab belgilanadi. ‘O‘zbekkonsert’dan litsenziya olishga kelganida suhbat qilinadi va mana shu jihatlariga e’tibor beriladi. Bu narsa o‘zi daromadiga ham qarab belgilanadi. Yana bir narsani aytib o‘tish kerakki, litsenziyaning kelajagi yo‘q. Shuning uchun kelajakda, albatta, undan voz kechamiz”, — deydi xonanda.
Mavzuga doir:
- Ozodbek Nazarbekov vazir bo‘lishdan ko‘ra xonandalik yaxshiroq ekani hamda hozirgi lavozimida qancha oylik olishi haqida gapirdi (video)
- Ozodbek Nazarbekov: “Andijon polkasini YUNESKO ro‘yxatiga kiritish bo‘yicha harakatlar boshlangan”
- “Biz xususiy telekanallarga ta’sir qila olmaymiz”. Ozodbek Nazarbekov kliplarni efirdan oldirib tashlash to‘g‘risida gapirdi
- Instagram: Otasiga mashina sovg‘a qilgan xonanda, serial uchun sochini kestirgan aktrisa, Ozodbek Nazarbekov bisotidagi eng qadrli narsa nima?