Twitter sud orqali Tesla va SpaceX rahbari Ilon Maskdan ijtimoiy tarmoqni 44 milliard dollarga sotib olish bo‘yicha bitimni oxiriga yetkazishni talab qildi, kompaniya uni platforma va uning aksiyadorlari qarshisidagi majburiyatlarini bajarishdan bosh tortishda aybladi, deb yozadi “RBK”.
Da’vo Delaverning Kansler sudiga berildi. Unda aytilishicha, biznesmen majburiyatlarini bajarishdan bosh tortgan, chunki oldi-sotdi bitimi uning shaxsiy manfaatlariga javob bermay qo‘ygan.
“Mask, aftidan, Delaver shtati shartnoma huquqi amal qiluvchi har qanday tomondan farqli o‘laroq, o‘zini fikrini o‘zgartirishga, kompaniyani xonavayron qilishga, uning faoliyatini buzishga, aksiyadorlik qiymatini yo‘q qilishga va ketishga haqli, deb o‘ylaydi”, — deyiladi hujjatda.
Twitter’dagilar fikricha, Maskning oldi-sotdi bitimini oxirigacha yetkazishdan bosh tortishi tomonlar kelishuvidagi jiddiy qoidabuzarliklarning uzun ro‘yxatidan keyin yuz bergan, ular ijtimoiy tarmoq obro‘siga putur yetkazgan. Twitter da’vo arizasining maqsadi sifatida Mask tomonidan yana qonunbuzarliklarga yo‘l qo‘ymaslik, yuridik majburiyatlarini bajarishga majburlash va bir qator shartlar bajarilganidan keyin bitimni yakuniga yetkazish ekanini aytdi.
Shuningdek, Twitter Maskning bitimni oxiriga yetkazmaslik qarorini “qonuniy kuchga ega bo‘lmagan va qonundan tashqari” deb atadi va ijtimoiy tarmoq tomonlar kelishuvidagi birorta ham majburiyatini buzmaganini da’vo qildi. Kompaniya spam-akkauntlar ulushi haqidagi o‘z ma’lumotlariga ishonchi komil ekanini ma’lum qildi va hisob-kitobni amalga oshirish va uning aniqligini ta’minlash uchun ekspertlardan foydalanishini qo‘shib qo‘ydi.
Delaver Kansler sudi ilgari kompaniyalarning bitimdan voz kechishiga yo‘l qo‘ymagan. Xususan, 2001-yilda Tyson Foods kompaniyasi IBP go‘sht kombinatini sotib olishdan bosh tortishga uringan, biroq sud bitim bajarilishi kerak, deb qaror chiqargan. Agar sud bitimdan chiqishga ruxsat bergan bo‘lsa ham, sud qarori zarar uchun kompensatsiya to‘lash majburiyatini yuklagan.
Ilon Mask Twitter soxta akkauntlar va spam-botlar haqida ma’lumot taqdim etmagani uchun, uni sotib olish haqidagi bitimdan voz kechgani 9-iyul kuni ma’lum bo‘ldi. Natijada 12-iyulga kelib, Twitter aksiyalari 11 foizga tushib ketdi.
OAVlarda Twitter sudga da’vo kiritishi haqida xabarlar paydo bo‘lgach, Mask ijtimoiy tarmoqqa post joylab, sudlashuv chog‘ida kompaniya spam-botlar va feyk-akkauntlar haqidagi ma’lumotlarni fosh qilishga majbur bo‘lishini aytdi.
Dunyoning eng boy odami (uning boyligi Forbes ma’lumotlari bo‘yicha 2022-yil apreli holatiga 219 milliard dollarni tashkil qiladi) Mask aprel oyida ijtimoiy tarmoqni 44 milliard dollarga sotib olmoqchi edi. Ammo keyinroq soxta va spam-akkauntlar Twitter umumiy foydalanuvchilari sonining 5 foizdan kamrog‘ini tashkil etishi haqidagi ma’lumotlar tasdiqlanguniga qadar olti-sotdi bitimini to‘xtatib qo‘ydi.
Aprel boshida Mask dastlab Twitter’ning 9,2 foiz ulushini sotib oldi va eng yirik aksiyadorlardan biriga aylandi, keyinroq esa ijtimoiy tarmoqni sotib olish niyatini ma’lum qildi va bitta aksiya uchun 54,20 dollardan taklif qildi.
Reuters agentligi Twitter’ning 2-maydagi hisobotiga tayanib, qalbaki akkauntlar va spam-botlar kundalik faol foydalanuvchilarning ko‘pi bilan 5 foizini tashkil etishini ma’lum qilgandi.
Biroq tadbirkor buni o‘zi tekshirib ko‘rishga qaror qildi. 100 ta tasodifiy hisob yozuvlarini tanlab olib, u feyk akkauntlar barcha foydalanuvchilarning kamida 20 foizini tashkil etadi, degan xulosaga keldi.
Izoh (0)