Shri-Lanka prezidenti Nandasena Gotabaya Rajapaksa mamlakatdan uchib ketdi. Bu haqda AFP mahalliy mansabdorlarga tayanib xabar berdi, deb yozadi “RBK”.
AFP’ga immigratsiya xizmati vakillari ma’lum qilishicha, Rajapaksa rafiqasi va tansoqchilari bilan birga 12-iyul, seshanbadan 13-iyul, chorshanbaga o‘tar kechasi Maldivga qarab uchgan An-32 harbiy samolyoti yo‘lovchilari orasida bo‘lgan.
“Interfaks” xabariga ko‘ra, mahalliy aviadispetcher xizmati dastlab Shri-Lanka prezidenti samolyotining qo‘nish so‘rovini rad etgan, so‘ng Maldiv xalq majlisi spikeri va sobiq prezident Muhammad Nashid vaziyatga aralashgan.
Avvalroq Rajapaksa Amerika vizasini olishga uringani, ammo unga rad javobi berilgani haqida The Hindu nashri AQSHning Kolombodagi elchixonasi amaldoriga tayanib ma’lum qilgandi. Parlament spikeri Maxina Yapa Abeyvardena prezident “qo‘shni mamlakatda” bo‘lib turganini aytgan, ammo keyinroq yanglishganini da’vo qilib, bu xabarni rad etgandi.
9-iyul kuni ertalab namoyishchilar prezident qarorgohini egallab oldi, prezident avvalroq u yerdan xavfsiz joyga ko‘chirib o‘tilgandi. O‘shandan buyon uning joylashgan joyi noma’lum bo‘lib turgandi. Shuningdek, bosh vazir Ranil Vikramasingxe ham xavfsiz boshpanaga joylashtirilgan, uning uyi esa o‘sha kuni kechqurun yoqib yuborildi. Kollupitiya provinsiyasi politsiyasi o‘t qo‘yilishi yuzasidan uch kishini hibsga oldi, keyinroq ularning ishi jinoiy tekshiruvlar bo‘limiga berildi.
Ommaviy tartibsizliklar va qarorgohining egallab olinishidan keyin Rajapaksa o‘z lavozimini tark etishga rozi bo‘ldi. Abeyvardena davlat rahbari 13-iyul kuni iste’foga chiqishini ma’lum qildi. Rajapaksa ketgan taqdirda parlament spikeri mamlakatning vaqtinchalik prezidentiga aylanadi. Vikramasingxe ham yangi umumpartiya hukumati shakllanganidan keyin bosh vazirlikdan ketishga rozilik berdi. Bir qator vazirlar ham iste’fo berishini e’lon qildi. Prezident qarorgohini egallab olgan namoyishchilar Rajapaksa, Vikramasingxe va hukumat iste’foga chiqmagunicha u yerni tark etmasligini ma’lum qilgandi.
9-iyuldagi ommaviy tartibsizliklar Shri-Lankada bahorda iqtisodiy inqiroz fonida boshlangan noroziliklarning avj nuqtasiga aylandi. Aprelda hukumat valyuta yetishmasligi tufayli eng zarur mahsulotlar importi bilan bog‘liq muammolar sababli tashqi qarz bo‘yicha defolt e’lon qildi. Moliya vazirligi mamlakatdagi moliyaviy vaziyat pandemiya va Ukrainadagi voqealar oqibatida yomonlashganini ma’lum qildi. Vazir Ali Sabrining hisob-kitoblariga ko‘ra, mamlakatda inqirozni yengish uchun tashqaridan 3 milliard yevro miqdorida moliyaviy ko‘mak kerak.
Mahalliy The Print gazetasi 9-iyul kungi tartibsizliklarda kamida 45 kishi jabrlangani haqida yozgandi, shularning yetti nafari — xavfsizlik kuchlari xodimlari. Ularning ko‘pchiligi namoyishchilar va politsiya o‘rtasidagi to‘qnashuvlarda jabrlandi, bunda xavfsizlik kuchlari suv zambarajlari va ko‘zni yoshlantiruvchi gazdan foydalangan.
Avvalroq BMT bosh kotibi Shri-Lankadagi inqirozni hal qilish uchun muloqotga chaqirgan edi.
Izoh (0)