Kuchli yomg‘irlar Pokistonning moliyaviy poytaxti Karachida katta suv toshqini va vayronagarchilikka olib keldi. Bu haqda Reuters xabar berdi.
Sind provinsiyasining bosh vaziri Murod Ali Shohning aytishicha, yerosti o‘tish joylarining aksariyat qismi suv ostida qolgan va toshqindagi suvlarni quyadigan joy yo‘q. Uning so‘zlariga ko‘ra, uch soat ichida misli ko‘rilmagan 126 millimetr yomg‘ir yog‘gan.
Mudofaa ma’muriyatining turar joy majmuasi va elita mahallalardagi ko‘chalar ham suv ostida qolgan. Oxirgi musson yomg‘irlari oqibatida bir kishining halok bo‘lgani tasdiqlandi, bunga qadar o‘tgan oy boshidan buyon 29 kishining o‘limi qayd etilgan.
Moliya institutlari va bank shtab-kvartirasi joylashgan Karachining markaziy ko‘chalari, jumladan, Pokiston markaziy banki ham suv ostida qolgan, qutqaruv xizmatlari qamalib qolgan odamlarga yetib borish uchun qayiqlardan foydalangan.
Pokiston harbiy-dengiz kuchlari ham qutqaruv operatsiyalarida ishtirok etmoqda, deyiladi hukumat bayonotida. Dengiz kuchlari va mahalliy hokimiyat vakillari jabrlangan qishloqlardan 500 ga yaqin odam va mahalliy amaldorlarni qutqardi, dedi hukumat matbuot kotibi Farhan Sulemon Ranjxo.
Bosh vazir Shahboz Sharif Twitter’dagi sahifasida “Karachida kuchli yomg‘irlar sabab yuzaga kelgan fojiali talafotdan chuqur qayg‘udaman” deb yozdi. U Karachi ma’muriyatiga barcha yordamni taklif qildi.
Bundan tashqari, Balujiston provinsiyasining janubi-g‘arbida joylashgan Lasbela tumanidagi o‘nga yaqin qishloqlar Vinder daryosining toshishi tufayli suv ostida qolgan. Metrologiya boshqarmasi yaqin kunlarda yomg‘ir yanada ko‘proq yog‘ishini prognoz qilmoqda.
Izoh (0)