Twitter суд орқали Tesla ва SpaceX раҳбари Илон Маскдан ижтимоий тармоқни 44 миллиард долларга сотиб олиш бўйича битимни охирига етказишни талаб қилди, компания уни платформа ва унинг акциядорлари қаршисидаги мажбуриятларини бажаришдан бош тортишда айблади, деб ёзади «РБК».
Даъво Дэлавернинг Канцлер судига берилди. Унда айтилишича, бизнесмен мажбуриятларини бажаришдан бош тортган, чунки олди-сотди битими унинг шахсий манфаатларига жавоб бермай қўйган.
«Маск, афтидан, Дэлавер штати шартнома ҳуқуқи амал қилувчи ҳар қандай томондан фарқли ўлароқ, ўзини фикрини ўзгартиришга, компанияни хонавайрон қилишга, унинг фаолиятини бузишга, акциядорлик қийматини йўқ қилишга ва кетишга ҳақли, деб ўйлайди», — дейилади ҳужжатда.
Twitter’дагилар фикрича, Маскнинг олди-сотди битимини охиригача етказишдан бош тортиши томонлар келишувидаги жиддий қоидабузарликларнинг узун рўйхатидан кейин юз берган, улар ижтимоий тармоқ обрўсига путур етказган. Twitter даъво аризасининг мақсади сифатида Маск томонидан яна қонунбузарликларга йўл қўймаслик, юридик мажбуриятларини бажаришга мажбурлаш ва бир қатор шартлар бажарилганидан кейин битимни якунига етказиш эканини айтди.
Шунингдек, Twitter Маскнинг битимни охирига етказмаслик қарорини «қонуний кучга эга бўлмаган ва қонундан ташқари» деб атади ва ижтимоий тармоқ томонлар келишувидаги бирорта ҳам мажбуриятини бузмаганини даъво қилди. Компания спам-аккаунтлар улуши ҳақидаги ўз маълумотларига ишончи комил эканини маълум қилди ва ҳисоб-китобни амалга ошириш ва унинг аниқлигини таъминлаш учун экспертлардан фойдаланишини қўшиб қўйди.
Делавер Канцлер суди илгари компанияларнинг битимдан воз кечишига йўл қўймаган. Хусусан, 2001 йилда Tyson Foods компанияси IBP гўшт комбинатини сотиб олишдан бош тортишга уринган, бироқ суд битим бажарилиши керак, деб қарор чиқарган. Агар суд битимдан чиқишга рухсат берган бўлса ҳам, суд қарори зарар учун компенсация тўлаш мажбуриятини юклаган.
Илон Маск Twitter сохта аккаунтлар ва спам-ботлар ҳақида маълумот тақдим этмагани учун, уни сотиб олиш ҳақидаги битимдан воз кечгани 9 июль куни маълум бўлди. Натижада 12 июлга келиб, Twitter акциялари 11 фоизга тушиб кетди.
ОАВларда Twitter судга даъво киритиши ҳақида хабарлар пайдо бўлгач, Маск ижтимоий тармоққа пост жойлаб, судлашув чоғида компания спам-ботлар ва фейк-аккаунтлар ҳақидаги маълумотларни фош қилишга мажбур бўлишини айтди.
Дунёнинг энг бой одами (унинг бойлиги Forbes маълумотлари бўйича 2022 йил апрели ҳолатига 219 миллиард долларни ташкил қилади) Маск апрель ойида ижтимоий тармоқни 44 миллиард долларга сотиб олмоқчи эди. Аммо кейинроқ сохта ва спам-аккаунтлар Twitter умумий фойдаланувчилари сонининг 5 фоиздан камроғини ташкил этиши ҳақидаги маълумотлар тасдиқлангунига қадар олти-сотди битимини тўхтатиб қўйди.
Апрель бошида Маск дастлаб Twitter’нинг 9,2 фоиз улушини сотиб олди ва энг йирик акциядорлардан бирига айланди, кейинроқ эса ижтимоий тармоқни сотиб олиш ниятини маълум қилди ва битта акция учун 54,20 доллардан таклиф қилди.
Reuters агентлиги Twitter’нинг 2 майдаги ҳисоботига таяниб, қалбаки аккаунтлар ва спам-ботлар кундалик фаол фойдаланувчиларнинг кўпи билан 5 фоизини ташкил этишини маълум қилганди.
Бироқ тадбиркор буни ўзи текшириб кўришга қарор қилди. 100 та тасодифий ҳисоб ёзувларини танлаб олиб, у фейк аккаунтлар барча фойдаланувчиларнинг камида 20 фоизини ташкил этади, деган хулосага келди.
Изоҳ (0)