NATO va Yevroittifoq mamlakatlari Ukrainaga yetkazib berilgan qurol-yarog‘lar Yevropa qora bozoriga tushib qolishidan xavfsirab, ular ustidan kuzatuvni yaxshilamoqchi, chunki G‘arb mamlakatlari qurollarning Ukraina chegarasidan o‘tganidan keyingi joylashgan joyidan bexabar. Bu haqda The Financial Times tomonlar o‘rtasidagi muzokaralarning borishidan xabardor bo‘lgan g‘arblik mansabdorlarga tayanib xabar berdi.
Hozir bir qator Yevroittifoq va NATO mamlakatlari Ukraina hukumati bilan qurollarni kuzatish yoki inventarizatsiya qilish tizimini yaratishni muhokama qilmoqda, Kiyevda yanada kengroq qamrovli monitoring tizimi ustida ishlashmoqda, deya ma’lum qildi gazeta manbalari. Ularning aniqlik kiritishicha, G‘arb qurol-yarog‘lari Polsha va Ukraina chegarasiga kelib tushmoqda, u yerdan furgonlar, yuk mashinalari yoki hatto xususiy avtomobillarda tashib ketilmoqda, ularning shundan keyingi joylashgan joyi noma’lum.
“Qurol-yarog‘lar qayerga yo‘naltirilayotgani, ulardan qayerda foydalanilayotgani yoki hatto ular mamlakatda qolyaptimi-yo‘qmi — bu bizga qorong‘i”, — dedi manba.
Davlat departamenti Kiyev AQSHdan olgan qurollarni tegishlicha qo‘llayotganiga ishonchi komil ekanini ta’kidlamoqda. Murakkab vaziyatga qaramasdan, bu masalada Ukraina tomoni bilan doimiy muloqot yo‘lga qo‘yilgan. Davlat departamenti rahbarining qurol-yarog‘ ustidan nazorat va xalqaro xavfsizlik bo‘yicha o‘rinbosari Deniz Jenkins qayd etishicha, “qurol-yarog‘ning noqonuniy sizib chiqishi bo‘yicha potensial ehtimol” muhokama qilinayotgan masalalar orasida bor.
Shuningdek, Ukraina hukumati da’vo qilishicha, qurol-yarog‘larning mamlakatga yoki mamlakatdan (ta’mir uchun) har qanday harakatlanishi puxtalik bilan ham Kiyev, ham boshqa mamlakatlar tomonidan nazorat qilinadi. Ukrainada qurol kontrabandasi bo‘yicha yirik markaz tashkil topgani haqidagi taxminlar haqiqatga to‘g‘ri kelmaydi, dedi Ukraina mudofaa vaziri maslahatchisi Yuriy Sak.
Avvalroq Rossiya mudofaa vaziri Sergey Shoygu Ukraina G‘arb davlatlaridan 28 ming tonnadan ortiq harbiy yuk olgani, qurollarning bir qismi Yaqin Sharqqa chiqib ketayotganini ma’lum qilgandi.
AQSH prezidenti Jo Bayden Ukrainaga qariyb 400 million dollar miqdorida qo‘shimcha harbiy yordam ajratishni topshirdi. Ushbu yordam paketiga to‘rtta HIMARS baravar o‘t ochish reaktiv tizimi va uning o‘q-dorilari, uchta taktik transport vositasi, 155 millimetrli artilleriya o‘q-dorilari, portlatuvchi o‘q-dorilar, kontrbatareya kurash tizimlari, harbiy texnika uchun ehtiyot qismlar va boshqa uskunalar kiradi.
Izoh (0)