Hindiston 2023-yilda Xitoyni ortda qoldirib, dunyoda aholisi eng ko‘p mamlakatga aylanadi, deb yozmoqda Reuters.
Birlashgan Millatlar Tashkilotining Butunjahon aholi kuni munosabati bilan e’lon qilgan hisobotiga ko‘ra, joriy yilning 15-noyabriga qadar 8 milliardga yetadigan dunyo aholisi 2030-yilda 8,5 milliardga, 2100-yilda esa 10,4 milliardga o‘sishi mumkin.
O‘n yilda bir marta o‘tkaziladigan ichki aholini ro‘yxatga olish ma’lumotlariga ko‘ra, Hindiston aholisi 2011-yilda 1,21 milliard kishini tashkil qilgan edi. 2021-yilda hukumat COVID-19 pandemiyasi sababli aholini ro‘yxatga olishni kechiktirgan.
BMT hisob-kitoblariga ko‘ra, dunyo aholisi 1950-yildan beri eng past sur’atda o‘smoqda va 2020-yilda o‘sish 1 foizdan pastga tushdi.
2021-yilda dunyo aholisining o‘rtacha tug‘ilish darajasi bir ayolga 2,3 bolani tashkil qildi, bu 1950-yilda 5 nafar bolaga teng edi. Prognozlarga ko‘ra, 2050-yilga borib dunyoda tug‘ilish darajasi yanada pasayadi — har bir ayolga 2,1 bola.
BMT hisobotida aytilishicha, pandemiya tufayli dunyoda o‘rtacha umr ko‘rish 2019-yildagi 72,8 yoshdan 2021-yilda 71 yoshga qisqardi.
BMT ma’lumotlariga ko‘ra, 2050-yilga borib dunyo aholisi o‘sishining yarmidan ko‘pi sakkizta davlatda — Kongo, Misr, Efiopiya, Hindiston, Nigeriya, Pokiston, Filippin va Tanzaniya Birlashgan respublikasida kuzatilishi prognoz qilinmoqda. 2050-yilgacha kutilayotgan o‘sishning yarmidan ko‘pi Afrikaning Sahroi Kabiri hissasiga to‘g‘ri kelishi kutilmoqda.
Izoh (0)